Ƀing khua hơmâo nao čuă, pơpŭ Tê̆t kơ hơdôm Puih kơđông tơhan Yok Đôn, Bo Heng hăng Dak Ruê. Khua mua tơring čar Dak Lăk tơña bla tơlơi hơdip mơda, bruă mă, pran jua kjăp blah ngă, pơgang lŏn ia, rơnuk rơnua ƀơi guai amăng hơdôm hrơi Tê̆t tui tơlơi phiăn dêh čar ta. Khua mua Jơnum min mơnuih ƀôn sang tơring čar Dak Lăk lăi pơhmư̆, thun 2025 laih rơgao hơmâo lu tơlơi tơnap, tơlơi lông lăng prong biă, samơ̆ tơring čar ăt hơmâo ngă lu bruă tŭ yua amăng bơwih ƀong huă - mơnuih mơnam.

Prăk pơhrui glăi kơ kơnuk kơna giăm 18.000 klai, đĭ rơbêh 30% pơhmu hăng mrô jao mơ̆ng Gơnong dlông, prăk sĭ gơnam hăng tač rơngiao hơmâo rơbêh 2,8 klai USD. Tơring čar lăng yom biă tơlơi gum pơgôp prong mơ̆ng tơhan blah ngă, amăng anun hơmâo Tơhan pơgang guai, djru bong kjăp lŏn ia, rơnuk rơnua, pơhlom ngă pô wai lăng guai dêh čar, yom biă mă hăng tơlơi hơđong kjăp, hăng đĭ kyar. Khua mua hơdôm anom bruă tơhan pơgang guai lăi pơthâo, tơhan hơmâo prăp rơmet hlâo bruă dŏ gak, pơhlom rơnuk rơnua amăng hrơi Tê̆t nguyên đán Bính Ngọ 2026; laih dong, hơdôm anom bruă ăt glăk gir pơphun jơlan hơdră djru ba tơlơi hơdip mơnuih ƀôn sang kah hăng “Bơyan bơnga tơhan pơgang guai pơđao pran ană plơi pla”, gum lăng ba tơlơi ƀong Tê̆t kơ mơnuih ƀôn sang pơ guai dêh čar.