Truh ră anai, tơring čar Lâm Đồng hơmâo akŏ pơjing 124 Jơnum min ruah khua gưl să djơ̆ tơlơi pơtrun, pơpha mơnuih, čih anăn tui hăng tơlơi phiăn pơkă; laih dơ̆ng akŏ pơjing 6 khul pơphun wai lăng bruă ruah khua pơ ala mơnuih ƀôn sang dêh čar hăng 38 khul wai lăng bruă ruah ƀing pơ ala mơnuih ƀôn sang ƀơi tơring čar pơyŭ.

Đơ đam tơring čar pơpha jing 6 bit anih ruah khua pơ ala mơnuih ƀôn sang dêh čar, amra ruah 17 čô pơ ala, 38 bit anih ruah khua pơ ala mơnuih ƀôn sang gưl tơring čar, ruah tŭ 85 čô ngă ding kơna pơ ala mơnuih ƀôn sang. Tơring čar akŏ pơjing 1.004 boh anih ruah ƀing pơ ala mơnuih ƀôn sang gưl să, phường, pioh ruah tŭ 2.949 čô pơ ala. Pơhiăp ƀơi mông jơnum klah čun mă bruă, Kơ-iăng khua mir sir, kơ-iăng khua jơnum min ruah khua dêh čar yă Võ Thị Ánh Xuân rơkâo tơring čar, kơtưn git gai, pơčrâo bruă, lăng kơ bruă ruah khua jing bruă mă gah kơđi čar yom phara biă mă, ƀu lui črăn hơdră pơpă ôh kaih, kơƀah hĭ ƀudah ngă sư̆ rơbư̆; khom hruă kơjăp bruă jŭ yap glăi tơhnal pơkă, anŏ gêh găl mơ̆ng mơnuih tơbiă anăn, kiăng pơhlom djơ̆ tơlơi phiăn pơtrun.