Ơi Điểu Ngăm (66 thun, djuai ania M’nông, dŏ pơ ƀon Bu Gia, să Quảng Trực) lăi pơthâo, hơdôm hrơi rơgao, ñu juăt nao pơ Sang gru grua plơi pla či sem lăng anăn ƀing khua či ba ruah amăng khul pơ ala mơnuih ƀôn sang să, rơwang bruă phrâo. Tui hăng ơi Điểu Ngăm, ƀing tơbiă anăn leng kơ hrăm gưl prong, mă bruă sui thun, yua hnun ñu kiăng dưi ruah mă mơnuih rơgơi, pơmin klă, kjăp pran jua, dưi pơ ala brơi tơlơi pơhiăp mơ̆ng ană plơi pla, pơtruh brơi hăng Ping gah, Kơnuk kơna hăng Mơnuih ƀôn sang, djru ba hơdră akŏ pơdong guai dêh čar jai hrơi pơdrong sah, thâo rơgơi: “Kâo tơkeng pơ anai, dŏ pơ anai mơ̆ng anet truh kơ prong. Hơdôm hrơi anai, rim hrơi yơh kâo weh nao pơ Sang gru grua plơi pla či lăng anăn ƀing khua či ba ruah ngă khua pơ ala mơnuih ƀôn sang să. Kâo pơ-ư ang mơn lơ̆m hơmâo nao plĕ hră, čang rơmang ruah mă mơnuih “hiăp thâo, ngă thâo”, sit nik pơ ala brơi plơi pla, djru ba plơi Quảng Trực anai jai hrơi pơdrong hloh”.

Amai Thị Huynh (djuai ania M’nông), Khua grup plĕ hră mrô 2 (ƀon Bu Prâng 2), să Quảng Trực brơi thâo, grup plĕ hră hơmâo năng ai 300 čô mơnuih plĕ hră, 98% jing mơnuih djuai ania M’nông. Tơdơi kơ mông Jơnum pơčrông ĕp mơnuih ba ruah tal dua (3/2), ñu hrŏm hăng 8 čô ping gah amăng plơi gir hyu pôr pơthâo, lăi pơthâo Tơlơi phiăn ruah khua, pơtô brơi neh met wa sem lăng anăn păn, bruă mă, tơlơi hrăm mơ̆ng ƀing tơbiă anăn či ruah, kiăng pơhlom bruă ruah khua djơ̆ tơlơi phiăn, ngă pô, ruah mă mơnuih rơgơi mơbruă, dưi pơ ala brơi tơlơi pơmin hăng tơlơi kiăng khăp mơ̆ng neh met wa: "Ră anai, Sang gru grua plơi hơmâo tĕp laih anăn ƀing či ba ruah ngă khua pơ ala mơnuih ƀôn sang să, kiăng neh met wa krăp lăng, ruah mă ƀing rơgơi, kjăp tơlơi pơmin, pơtruh brơi Mơnuih ƀôn sang Ping gah, Kơnuk kơna. Mơ̆ng anun gum ba hơdră djru mơ̆ng ngŏ kơ tuh pơ alin, man pơdong anih anom djru neh met wa jai hrơi đĭ kyar”.

Tal ruah khua pơ ala mơnuih ƀôn sang dêh čar tal 16 hăng khua mua pơ ala mơnuih ƀôn sang djŏp gưl thun 2026-2031, să Quảng Trực hơmâo rơbêh 7.200 čô mơnuih nao plĕ hră, plĕ ƀơi 12 bit anih amăng 11 boh plơi hăng ƀơi Trung đoàn 726. Ơi Đoàn Lê Anh, Khua jơnum min djŏp djuai ania mơnuih mơnam Việt Nam să Quảng Trực lăi pơhmư̆, bruă pơhlom hơđong plơi pla, anih plĕ hră, prăp rơmet čơkă tuai, kơthung plĕ hră hăng djŏp bruă bơwih brơi hrơi plĕ hră hơmâo ngă djŏp laih. Ră anai să glăk ngă giong hơdôm bruă dŏ glăi, prăp lui jơnum pơčrông sai mơnuih tơbiă anăn tal rơnuč, čih anăn ƀing či ba ruah sit nik ƀơi Jơnum min pơ ala mơnuih ƀôn sang să rơwang bruă pơ anăp. Ơi Đoàn Lê Anh brơi thâo: “Ruah khua rơwang bruă 2026-2031, gơmơi glăk ngă hrŏm hăng hơdôm anom bruă či tơguan tơdơi kơ mông Jơnum pơčrông sai tal 3 hơmâo anăn ƀing khua či ba ruah ngă ding kơ kơna pơ ala mơnuih ƀôn sang dêh čar ăt kah hăng khua mua pơ ala mơnuih ƀôn sang tơring čar mơit glăi djŏp tơring ngă tui djơ̆ bruă kiăng ngă tŏ tui, pơhlom bruă ruah khua djơ̆ tơlơi phiăn. Hăng Jơnum min pơ ala mơnuih ƀôn sang să gơmơi sem lăng, prăp lui kiăng mông Jơnum ruah khua tal rơnuč čih anăn mơ̆ng 40 čô khua jing dŏ glăi 33 čô, anăp nao ruah mă 20 čô khua pơ ala mơnuih ƀôn sang ƀơi sang să sit nik mă bruă amăng rơwang thun pơ anăp”.

Hăng tơlơi prăp rơmet klă tui anai, bruă ruah khua ƀơi să guai dêh čar Quảng Trực đăo kơnang amra hơmâo tơlơi dưi ngă pô, djơ̆ tơlơi phiăn, ngă mơak mơai pran jua mơnuih ƀôn sang. Neh met wa djuai ania M’nông mơit tơlơi đăo kơnang amăng hla pơ-ar nao plĕ, čang rơmang ruah mă mơnuih rơgơi thâo pơmin, jê̆ giăm, thâo hluh mơnuih ƀôn sang. Mơ̆ng anun, djru akŏ pơdong plơi pla Quảng Trực jai hrơi pơdrong sah, thâo rơgơi./.