Amăng mơkrah thun anai, đơ đam dêh čar hơmâo 23 wơ̆t tơlơi truh apui lơtrik hrip mơnuih ƀôn sang ngă 11 čô mơnuih djai hăng 23 čô mơnuih rơka rơkač. Phun ñu yua mơnuih ƀôn sang ming pơkra mă hrĕ apui lơtrik, dưm truă, hlă hnăl pôr pơthâo hăng pơkĕ apui lơtrik ƀơi anih giăm hrĕ apui lơtrik jua kơtang, ƀơi anŏ klĕ dơ̆p hrĕ apui lơtrik, gơnam yua apui lơtrik. Ƀơi tơring čar Dak Lak, kiăng pơhlôm hlâo tơlơi truh apui lơtrik hrip mơnuih ƀôn sang, Anom bruă apui lơtrik Dak Lak hơmâo kơtưn hyu sem lăng hrĕ apui lơtrik, lăi pơthâo, pơpha hră pơčrâo ba kiăng pơhlôm pơgang rơnuk rơnua ƀơi gong apui lơtrik jua kơtang kơ mơnuih ƀôn sang.

Boh nik ñu amăng bơyan hơjan hlim rơbŭ kơthel thun anai, djop anom bruă apui lơtrik ngă hrom gong gai kơnuk kơna tơring glông hyu pơtô lăi mơnuih ƀôn sang thâo hluh lơ̆m pơkĕ yua apui lơtrik. Amăng anun, anom bruă apui lơtrik pơtă pơtăn anăm toh ruh angten pôr jua pơhiăp, akă klơi ƀhu eng ao giăm hrĕ apui lơtrik ôh; ƀu dưi pơnah, wă čĭm brĭm găm ƀơi hrĕ apui lơtrik, ƀu pơpor klang, gơnam ngui thâo por giăm hrĕ gong apui lơtrik; ƀu akă hlô mơnong rơmô kơbao ƀơi gong apui lơtrik....Laih dơ̆ng, rĭm hrơi, lơ̆m jah agaih jơlan treng hrĕ apui lơtrik ƀudah ngă hmua pla pơjing giăm anih hơmâo gong apui lơtrik jua kơtang, ƀing ngă bruă pơkra ming hrĕ apui lơtrik sem lăng na nao kông ter pơkă apui lơtrik, pơtô lăi na nao kơ mơnuih ƀôn sang kiăng pơhlôm hlâo tơlơi truh sat lơ̆m yua apui lơtrik.