VOV4.Jarai-Ƀơi tơring čar Dak Lak ră anai hơmâo truh 36 kơčăo bruă ba ia yua, pin ia pơtum brơi mơnuih ƀôn sang kual plơi pla dô̆ yua răm ƀudah ƀu thâo yua ôh. Tơlơi anai, ngă rơngiă soh sel, huač prăk kăk tuh pơ alin hơdôm klai prăk, samơ̆ mơnuih ƀôn sang ăt tŭ tơlơi kơƀah ia yua amăng bơyan phang, ƀu ia hơdjă či mơñum.

Ring bruă ia hơdjă plơi pla ƀơi ƀôn Trăp, să Čư̆ Mgar, tơring glông Čư̆ Mgar tuh pơ alin man pơkra mơ̆ng thun 2017 truh thun 2019 giong. Rơnoh prăk tuh pơ alin 12 klai prăk mơ̆ng prăk kơnuk kơna, pioh djru pơđoh, ba ia yua kơ 500 boh sang anŏ mơnuih ƀôn sang ƀôn Ling, ƀôn Trăp hăng ƀôn Thung. Yă H’Ƀun Kƀuôr dŏ pơ ƀôn Trăp lăi, ring bruă anai mă yua kơnong hơdôm blan đôč pơdơi yơh amăng 3 thun laih rơgao, ră anai lui jing rơngôl sô, rơ̆k čăt đĭ gôm sir abih. Sang anŏ tơnap biă mă hơduah ia či sô̆ mơñum:

“Ƀu hơmâo ia măi či yua, sang anŏ gơmơi wơ̆i bơmun đôč yơh. Bơyan phang lĕ ia bơmun wơi ăt thun hĭ mơ̆n, gơmơi hyu rơkâo ia arăng či yua ƀudah blơi ia mơñum, hơtŭk riă; bơ ia mơnơi hơgơi, boh eng ao lĕ đĭ rơdêh kai nao pơgiăng ia dơnao arăng pơkong adih ba glăi yua”.

Đơ đam tơring čar Dak Lak ră anai hơmâo 36/123 ring bruă

ia hơdjă răm ƀu thâo yua

Pơblang tong ten kơ tơlơi ring bruă ia hơdjă 12 klai prăk mơ̆n mă yua kơnong hơdôm blan răm yơh, yă Phạm Thị Tiềm, Khua jơnum min mơnuih ƀôn sang să Čư̆ Mgar, brơi thâo, phun ñu yua kơ bruă wai lăng ba yua ƀu tŭ yua ôh. Blung a, să jao kơ 3 čô khua plơi ngă hrom wai lăng, mă yua. Hơmâo yua hĭ hơdôm blan đôč, abih 3 čô gơñu jao glăi ring bruă ia hơdjă anun soh, yua lăi ƀu dưi pơhrui prăk mơnuih ƀôn sang ôh kiăng tla prăk apui lơtrik. Thun 2020, să akŏ pơjing grup mă yua wai lăng ring bruă ia hơdjă ƀôn Trăp. Samơ̆, yua ƀu thâo bruă wai lăng hăng pơhrui prăk apui lơtrik anun yơh tơnap tap, khom pơdơi hĭ mă yua ring bruă ia hơdjă anun. Yă Phạm Thị Tiềm lăi rơđah tui anai:

“Jơnum min mơnuih ƀôn sang să rơkâo jao glăi kơ anom bruă ia hơdjă hăng rơnăk ayuh hyiăng gah Gơnong bruă Ngă hmua hăng Pơđĭ kyar plơi pla wai lăng, ƀơi jơnum min mơnuih ƀôn sang să gơmơi lĕ ƀu hơmâo pô thâo hruaih ôh wai lăng ring bruă anai. Gơmơi bơngơ̆t mơ̆n hŭi răm pơpă, răm anŏ hơgĕt amăng gŭ lŏn adih gơmơi ƀu thâo ƀuh ôh pioh pơkra ming glăi. Yua kơ anun kiăng jao glăi kơ anom bruă hơmâo tơlơi thâo hruaih git gai ba yua tŭ yua hloh"”

Anom bruă wai lăng ia hơdjă hăng pơgang ayuh hyiăng Dak Lak ĕp glăi brơi thâo, đơ đam tơring čar hơmâo 36 ring bruă amăng abih bang 123 ring bruă ia hơdjă brơi mơnuih ƀôn sang kual plơi pla yua hrom răm hĭ, pơdơi mă bruă. Phun ñu yua kơ bruă tuh pơ alin raih daih, mơnuih yua ia ƀiă, lơ̆m anun prăk apah mă bruă lu anun yơh, prăk apah ƀu djop rơnoh prăk tla kơ mơnuih wai lăng ring bruă. Djop ring bruă hơmâo jao kơ să wai lăng tăp năng truh pơ plơi pla wai lăng; mơnuih apăn bruă ƀu thâo pơkra ming mă yua ôh anun rơngiă soh sel; ƀu hơmâo kơmlai, ƀu hơmâo prăk tla ring bruă khom pơdơi đôč.

Djop ring bruă ia hơdjă kual plơi pla răm tui, lui soh sel ngă huač đôč hơdôm klai prăk mơ̆ng kơnuk kơna,

mơnuih ƀôn sang ăt ƀu hơmâo yua lơi

Tui hăng ơi Phạm Ngọc Bình-Khua anom bruă ia hơdjă hăng rơnăk ayuh hyiăng Dak Lak, kiăng rŭ glăi djop ring bruă ba ia yua amăng kual plơi pla, anom bruă anai ngă hrom Jơnum min mơnuih ƀôn sang tơring glông, plơi prong brơi jŭ yap glăi, čih pơkra dăp bruă; laih dơ̆ng kơtưn pơtô kơ mơnuih ƀôn sang thâo hluh anŏ tŭ yua kơ bruă ba ia hơdjă, tuh pơ alin ring bruă phun djru kơ mơnuih ƀôn sang:

“Hrơi blan pơ anăp, tuh pơ alin, djop sang bruă jao tuh pơ alin khom kơsem min tong ten kiăng kơ ring bruă ba ia yua khom ngă mơ̆ng man ƀrô truh pơ prong hloh, mrô mơnuih ƀôn sang yua lu hloh, mơ̆ng anun tuh pơ alin rơnoh prăk amra rơgêh hloh, ba yua tŭ yua hloh. Tơlơi mơ̆ jao kơ anom bruă mă yua, kiăng pơtrut lu anom bruă sĭ mơdrô hơmâo prăk kăk gơñu juă nua tuh pơ alin pioh ngă hrom amăng bruă anai tuh pơ alin man pơkra hăng wai lăng pơhrui prăk djơ̆ tơlơi phiăn”.

Tuấn Long pô čih-Nay Jek: Pơblang