Tlam lơ 20/12, Kông an Dak Lak jơnum Online hăng djop tơring glông, plơi prong amăng tơring čar kiăng pơtong glăi tơlơi pơhing, hơdră pơhlôm, pơgăn tơlơi soh sat, tơlơi truh pơdjơ̆ nao mơ̆ng ƀơt, mlăi pơtuh ngă ƀơi čơđai sang hră. Tui hăng hră lăi pơthâo ƀơi mông jơnum, kơnong amăng rơwang hrơi kom anai đôč ƀơi Dak Lak hơmâo ƀuh 12 wơ̆t tơlơi truh, 57 čô čơđai sang hră pơkra mă mlăi pơtuh, lu čơđai djơ̆ mlăi pơtuh rơka  rơkač.

Anom bruă kơnuk kơna hơmâo pơhrui hăng mă pơkong 27 kg put pơtuh pioh pơkra mlăi, giăm 300 asar ƀơt, mlăi laih pơkra giong. Lu wơ̆t pơkra mă hơmâo lu čơđai sang hră ngă hrŏm laih anun hơmâo tơlơi truh ƀơt pơtuh ruă nuă rơka rơkač. Kông an hơmâo pok pơhai khut khăt ngă tui hơdră pơgăn tơlơi anai, kiăng pơgăn bruă sĭ mơdrô dŏp put jrao ngă pơtuh pioh pơkra rai mlăi hŭi bơbeč djơ̆ kơ čơđai muai, biă mă ñu čơđai sang hră, lir hơbit hăng bruă hyu pơtô lăi, pôr pơthâo, jak iâu mơnuih ƀôn sang, amĭ ama ƀing čơđai sang hră thâo hluh tong ten hăng ngă tui djơ̆ tơlơi phiăn pơkă kơ bruă wai lăng, pơkra ming, pơdŭ pơgiăng, mă yua mlăi pơtuh.