Jơnum min mơnuih ƀôn sang tơring čar Dak Lak phrâo mă yua Hră pơ-ar mrô 12032 kơ bruă dưm dăp, pơphun jơlan gah mă bruă hơdôm bôh ƀirô gah Jơnum min mơnuih ƀôn sang tơring čar, Jơnum min mơnuih ƀôn sang gưl tơring glông kiăng pơjing glông jơlan wai lăng kơnuk kơna tŭ yua, ba glăi bôh tơhnal, djơ̆ tui tơlơi kiăng pơplih hơdră mă bruă amăng rơwang phrâo. Kiăo tui anun, tơring čar amra pơphun lăp djơ̆ hăng pơmut hrŏm sa dua gơnong bruă, anom bruă, hrŏm hăng anun pơplih pơkra hơdră pơphun bruă amăng ƀirô pioh plai ƀiă anom phun, pơđĭ dlông bruă wai lăng. Rơđah biă ñu: Gơnong bruă kơčăo bruă hăng tuh pơplai hăng Gơnong bruă prăk kak amra pơmut hrŏm jing Gơnong bruă bơwih ƀong – prăk kak. Gơnong bruă kông ngăn glai klô hăng rơhuông adai lŏn mơnai. Gơnong bruă man pơdŏng hăng Gơnong bruă jơlan nao rai dŭ pơgiăng amra pơmut hrŏm Gơnong bruă man pơdŏng hăng jơlan nao rai.

Gơnong bruă gong gai hăng Gơnong bruă wai lăng mơnuih mă bruă, tơhan rơka ruă hăng mơnuih mơnam amra pơmut jing Gơnong bruă gong gai hăng mơnuih mă bruă. Gơnong bruă kơsem min bôh thâo phrâo măi mok hăng Gơnong bruă pơhing hăng pôr pơhing amra jing Gơnong bruă kơsem min hơdră phrâo măi mok hăng pôr pơhing. Tơring car amra pơphun pơmut mơn Gong phun pơtui jua pơhiăp hăng pơdah rup hrŏm hăng Anom čih tơlơi pơhing Dak Lak jing Anom pôr pơhing tơring čar Dak Lak, djru ngă pơplih đut hlah hơdôm glông jơlan pôr pơhing hăng pơđĭ kơjăp bruă pôr pơhing. Tơdơi kơ hơdôm gơnong bruă dưi pơmut hrŏm hăng pơplih, Dak Lak amra hrŏ trun ƀiă biă mă ñu 9 gơnong bruă, djru hrŏ trun glông jơlan mă yua čar, hrŏ trun hơdôm anih anom phun, hăng pơđĭ dlông tŭ yua bruă wai lăng kơnuk kơna./.