Rơbêh kơ sa rơwang hrơi tơjuh rơgao, ƀơi sang Jơnum Châu Sơn, să Čư̆ Êbur, plơi prong Buôn Ma Thuột, neh wa tui đăo khôp đing nao pơhrôp prăp lui čơkă jơnum prong Noel. Hlơi hlơi leng kơ hur har pran jua. Đa truă apui, đa dui hrĕ pơkĕ apui, đa pơkra rơ-ưng bôh pơtâo, đa pơkra bah amăng war, dưm nao amăng ƀiă kơpaih, tep nao keo ƀơi rơ-ưng bôh pơtâo prong. Ơi Trần Trọng Khánh, Khua thôn 12, să Čư̆ Êbur lăi pơthâo:

 “Rim thun tui phiăn juăt ƀing gơmơi pơkra rơ-ưng bôh pơtâo ăt kah hăng abih bang pơhrôp ƀơi jơlan plơi ƀơi akô̆ plơi kiăng kơ hiam kơ anih anom mơ̆ng hrơi jơnum Noel hrŏm hăng anun amăng pran jua anai lĕ pơpŭ bơni kơ Khua yang adai hăng ngă hiưm hơpă pioh hmâo pran jua gum hrŏm hơbit hăng neh wa tui đăo adai ăt kah hăng neh wa ƀơi djop kual”.

Hơdôm hrơi rơgao, khă glăk gun lu bruă hăng bơyan pĕ kơphê, samơ̆ neh wa tui đăo khôp ƀơi să Ea Tiêu, tơring glông Čư̆ Kuiñ ăt pioh mơn mông pơhrôp amăng sang hăng ƀơi anih jơnum. Tŏng ten ruah mă hơdôm bôh rup vil pơhrôp phun hngô Noel. Ơi Nguyễn Phước Thành, dô̆ ƀơi thôn 1, să Ea Tiêu, tơring glông Čư̆ Kuiñ brơi thâo:

 “Hăng thun thâo lĕ Noel thun anai mơ-ak hloh, yua kơ nua gơnam, lăi hrŏm sang hlơi hlơi leng kơ pơhrôp soh. Ăt ngă pơkra amăng rơ-ưng bôh pơtâo sang anô̆ mơn, ƀôn ƀut jum dar, rim ƀơi anih čơlah 4 pơkra sa amăng rơ-ưng bôh pơtâo. Lăi hrŏm mơ-ak biă”.

Ăt amăng tơlơi mơ-ak čơkă hrơi Noel mơn, amai Trần Thị Anh Thi, ƀơi phường Tân Thành, plơi prong Buôn Ma Thuột brơi thâo, anih anom sĭ gơnam pơdă prưng Noel thun anai lu mơta gru rup, ia ayiom, hơdư̆ hor brơi kơ mơnuih thâo pơčeh pơjing:

 “Kâo pơhrôp Noel tui phiăn juăt hơdôm thun mơ̆ng sang anô̆ đôč. Sang kâo hmâo hơđăp gơnam pơhrôp ƀơi sang, sit truh bơyan Noel thơ amra mă phun kyâo hngô hơđăp pioh yua pơkra, anô̆ hơget kơƀah lĕ ta nao blơi mă dong. Kah hăng thun anai kâo hor ia prăk lĕ kâo blơi dong djuai ia prăk”.

Amai Lê Thị Kim Anh, khua anom sĭ gơnam ƀơi jơlan Lý Thường Kiệt, plơi prong Buôn Ma Thuột brơi thâo, bơyan Noel thun anai, hmâo lu gơnam pơkra hiam mơta lăng, pơdah tơlơi pơañen, pơkra tơnap mơ̆ng rim mơta rup dưm dăp.

 “Thun anai mơnuih blơi yua tañ biă, biă ñu hơdôm bôh sang jưh tuai, ƀirô laih anun hơdôm anih sĭ kơphê mơñum arăng kiăng pơhrôp tañ pioh ngă pơhưč tuai. Hơdôm hrơi anai kơnong kơ hmâo sang anô̆ kâo ruah mă pơhrôp kyâo hngô, laih anun amăng rơ-ưng bôh pơthâo. Bruă bơwih ƀong pơđĭ kyar anun tơlơi kiăng jai dlông tui khom hmâo gru rup jai hrơi jai hiam”.

Sa bơyan Noel glăk truh amăng tơlơi mơ-ak, hyơhyor kơ pran jua mơ̆ng neh wa tui đăo Khua yang ƀơi Dak Lak, anăp nao sa thun phrâo bă kơ tơlơi mơ-ak hăng tâ̆o yâo./.