Kơ-iăng Khua dêh čar ơi Lê Thành Long pơsit tong Ping gah, Kơnuk kơna Việt Nam lêng kơ lăng yôm bruă hơkrŭ hăng pơđĭ kyar tơlơi rô nao rai giang mah hăng dêh čar ha guai, ngă hrŏm yôm phăn djop mơta Việt Nam-Khač, anai lĕ tơlơi rơkâo tui tơlơi gal, tơlơi ruah phun hăng đing nao hloh amăng hơdră bruă pơtom hiăp rơngai, ngă pô, djop bơnah, djop mơta mơng Việt Nam.

Kiăng hơkrŭ kjăp hăng ngă tui tơlơi yak nao pơđĭ kyar hiam klă amăng tơlơi rô nao rai dua Ping gah, dua dêh čar pơ anăp, sit biă ñu lĕ amăng thun 2025 hơdor glăi 75 thun akŏ pơjing tơlơi rô nao rai pơtom hiăp dua bơnah, kơ-iăng Khua dêh čar ơi Lê Thành Long rơkâo khua anih jưh Hà Vĩ hăng Sang anih jưh pơ ala dêh čar Khač ƀơi Việt Nam pơtrut hơdôm anom bruă bơdjơ̆ nao mơng dêh čar Khač gum hrŏm kjăp hăng djop ding jum, gơnong bruă, gong gai ƀon lan Việt Nam pok pơhai ngă tui tŭ yua tơlơi pơkôl hăng tơlơi pơmĭn hrŏm mơng gưl prong, djă pioh hăng tŏ tui gru grua hiam klă anun lĕ pơbưp, pơlăi nao rai na nao kơplah wah khua mua pơprong hăng djop gưl mơng dua Ping gah hăng dua kơnuk kơna.