Hră lăi pơthâo bruă kơđi čar ba tơbiă hơdôm hơnong pơkă bơwih ƀong yơyôm mơ̆ng tơring čar Dak Lăk rơwang thun 2025-2030. Biă ñu lĕ mrô rơnoh đĭ kyar bơwih ƀong huă mơ̆ng 11,5% rim thun truh kơ lu hloh; prăk pơhrui yap tui akŏ mơnuih thun 2030 hơmâo 160 klăk; bruă ngă hmua đĭ 6,85%/thun; bruă pơkra măi mok - man pơdong đĭ 18,1%; bơwih bơwang đĭ 11,25%.

Pơgôp hiăp ƀơi mông jơnum, ơi Đào Tấn Lộc, khua ping gah hơđăp tơring čar Phú Yên lăi, hơdôm rơnoh pơkă ăt dŏ lu đơi mơn pơhmu hăng tơlơi sit hơmâo, biă ñu amăng hrơi mông anai:“Rơnoh đĭ kyar ngă hmua 6,84% tui hăng kâo pơmin lu đơi, yua hui đôč mơ̆ng hơmâo tui anun, laih dong bruă ngă hmua kơnang kơ ayuh hyiăng hăng anih blơi sĭ, ƀing ta aka ƀu dưi ngă klă ôh dua mơta bruă anun, jing kiăng pơmin glăi dong. Giong anun gah bruă măi mok man pơdong lĕ 18,1% ăt lu mơn kâo lăng. Tơdah gir thơ dưi ngă rơgao mơn, samơ̆ bruă pơkra măi mok ñu kơnang kơ prăk tuh pơ alin mơ̆ng mơnuih tơpuôl”.

Lăng yôm biă bruă prăp rơmet mơ̆ng Grup čih pơkra hră, ơi Cao Đức Khiêm, Kơ-iăng khua ping gah hơđăp tơring čar Dak Lăk, tŭ ư hăng 17 hơnong pơkă, 5 mơta bruă pơsir hăng 3 mơta tơlơi pơplih prong hơmâo ba tơbiă. Khă hnun, ñu lăi dlăm kơ tơlơi kiăng pơđĭ tui mơnuih mă bruă rơgơi:“Kâo lăng ƀing gih kơnong kơ lăng nao ƀing khua wai lăng đôč, aka ƀu lăi nao ôh mơnuih mă bruă lĕ ƀing kĭ sư, kông ñơn apăn bruă măi mok kiăng dưi mă prăk FDI. Dua dong lĕ anih anom, kâo lăng ăt dŏ anet mơn, kiăng pơhrua glăi dong bruă čuk pơkra mơ̆ng tơring čar Dak Lăk ƀơi hơdôm kual sang măi, măi mok yơyôm, dưi mă bruă na nao”.

Jơnum tal anai hơmâo 11 tơlơi pơgôp hiăp, hơmâo 5 pok hră ba pơčrông sai hăng 6 tơlơi pơgôp hiăp ƀơi anăp mông jơnum mơtăm. Pơhmư̆ tơlơi pơgôp hiăp ƀơi mông jơnum, ơi Nguyễn Đình Trung, ding kơna Ping gah, Khua git gai Ping gah tơring čar, Khua grup čih pơkra hră kơ mông Jơnum ruah khua ping gah tơring čar Dak Lăk tal 18 brơi thâo, grup ngă bruă amra pơhmư̆, sem lăng tong ten hơdôm tơlơi pơgôp hiăp:“Ƀing hơmơi amra hmư̆ tui abih bang hăng pok pơhai hơdôm bruă rơđah rơđông lơ̆m pok pơhai Tơlơi pơtrun Jơnum ping gah, ƀudah bơwih brơi bruă git gai črâo bruă mơ̆ng ping gah, Jơnum min pơ ala mơnuih ƀôn sang, Jơnum min mơnuih ƀôn sang či pok pơhai klă djŏp bruă mơ̆ng Dak Lăk klă hloh. Tơdơi kơ mông jơnum anai, tơring čar ăt kiăng pơhmư̆ tơlơi pơgôp hiăp mơ̆ng ƀing khua laih anun gơmơi kiăng hmư̆ biă mă”./.