Boh tơhnal anai, Dak Lak dưi ngă djơ̆ tơlơi kiăng ba yua mrô rơnoh jŭ yap, thâo krăn tơlơi pơđĭ kyar hăng akŏ pơjing hơdră pơtrut tơlơi bơwih ƀong huă dua mrô.

Tui hăng anun, Dak Lak hơmâo rơbêh 16.000 boh sang bruă mơdrô bơih ƀong, năng ai 147.000 anih sĭ mơdrô raih daih, anet, man ƀrô amăng sang anŏ mơnuih ƀôn sang. Rơnoh prăk pơhrui glăi amăng kual sang bruă mơdrô hơmâo rơbêh 360.000 klai. Mrô rơnoh jŭ yap ăt amra ĕp glăi tong ten, ngă giong pioh bơwih brơi kơ bruă git gai, wai lăng. Bruă ba yua mrô rơnoh ĕp lăng, jŭ yap anai hơmâo anŏ tŭ yua biă mă kơ bruă dăp glăi tơlơi bơwih ƀong huă, pơblih yua mrô pơđĭ kyar, ngă kơtang hloh pran jua mă bruă pơhno nao rai djop sang bruă mơdrô.