Kơnôl 9/11/1946, ƀơi mông jơnum lok dua, khua mua pơ ala mơnuih ƀôn sang dêh čar tal I hơmâo pơsit hĭ Phiah phiăn blung a Lơ̆n ia Việt Nam Dân chủ Cộng hoà, djă pioh kơđŏm gru phun, sa yak phrâo pơđĭ kyar yom amăng bruă čih tơlơi phiăn phun dêh čar, akŏ pơjing anom bruă khua pơ ala jing sang bruă čih pơkra tơlơi phiăn kơ lơ̆n ia. Phiah phiăn thun 1946 dưi pơsit lĕ hơmâo pơtong rơđah lơ̆n ia ta pơklaih rơngai mơ-ai pô, pơtong rơđah tơlơi phiăn mă bruă pơphun pơpha bruă mă amăng gong gai kơnuk kơna dêh čar, laih dơ̆ng čih pioh tơlơi dưi hăng bruă khom ngă phun mơ̆ng mơnuih ƀôn sang dêh čar.

Phiah phiăn thun 1946 pơdah rai tơlơi pơmin hiam klă, akŏ pơdong kơnuk kơna Lơ̆n ia kơ mơnuih ƀôn sang ngă pô, pơpŭ tơlơi dưi ngă pô lơ̆n ia mơ̆ng mơnuih ƀôn sang, tơlơi rơngai mơ-ai pô hăng mơnuih ƀôn sang ngă khua pô laih anun tơlơi pơkă abih bang bơkơnar soh tui tơlơi phiăn dêh čar pơtrun. Găn rơgao 80 thun, hrŏm hăng bruă man pơdong, wai pơgang hăng lơ̆n ia pơđĭ kyar, glông bruă tơlơi phiăn Việt Nam ƀu pơdơi ôh pơđĭ kyar prong tui, djop hloh, gêh găl bruă git gai wai lăng mơ̆ng kơnuk kơna, pơđĭ kyar bơwih ƀong huă-mơnuih mơnam hăng mut phung jar kmar. Hơdôm rơnoh yom kơ tơlơi rơngai djuai ania, ngă pô lơ̆n ia mơ̆ng mơnuih ƀôn sang, pơhlom tơlơi dưi ană mơnuih, tơlơi dưi mơnuih ƀôn sang dêh čar hăng pơphun sang bruă hơmâo tơlơi dưi prong hloh amăng kơnuk kơna tui hăng Phiah phiăn čih pơkra, tŏ tui pơhrua na nao pơđĭ kyar hơmâo pơhrua hơdôm wơ̆t phiah phiăn dêh čar truh ră anai.