Tong krah đang pla phun ñông ƀơi plơi Bi, să Ia Dom, ha bơnah đang pla hơmâo koh rơmet kiăng djru brơi bruă hyu ĕp tơlang tơleh. Hơdôm phun ñông glăk amăng bơyan pĕ pơhrui hơmâo koh drôm hĭ tui tơlơi čang rơmang mơng pô hmua lĕ tha plơi Siu Pich, sa čô tơhan hơđăp hlâo adih djru blah wang ƀơi kual giăm guai gah kual Yŭ Dơnung.

Amăng hơdôm hrơi nao ngă hmua, ơi Pich hơmâo ĕp ƀuh akhăn kơtăng, jao gloh đĭ mơng atur lŏn amăng đang pla boh ñông. Đăo lăng tơlang tơhan, ñu lăi pơthâo brơi anom bruă bơdjơ̆ nao, ba jơlan hăng črâo brơi anih kiăng ling tơhan ĕp lăng. Mah đang pla boh nông lĕ anih pla gơnam pơhrui mơng sang anŏ, tha plơi Siu Pich ƀu hŭi koh drôm hĭ, ngă rơhông rơhaih brơi kơ bruă hyu ĕp tơlang tơhan dŏ đih glăi. “Phun pla kâo koh drôm hĭ samơ̆ ăt huăi hơget ôh, amra koh drôm dong tơdah kiăng, yua ƀing gŏp glăk đih glăi amăng lŏn, pap biă mă.”

Mut ngă tơhan blan 11/1975, juăt blah wang ƀơi kual giăm guai Yŭ dơnung, tha plơi Siu Pich hluh rơđah tơlơi glêh glar mơng rơnuk blah wang hăng tơlơi ngă ruă amăng pran jua lơm ƀing gŏp djai pơsăn drơi. Yua anun, lơm ling tơhan grup K52 pơwot glăi pơ kual giăm guai ĕp tơlang tơhan djai pơsăn drơi, ơi Pich ăt hơdor glăi thun blan blah wang đưm hlâo adih.

Giăm ha blan anai, đang pla boh ñông ataih giăm 7 km jing anih ñu juăt găn nao. Samơ, lơm hơmâo wăn, ñu ăt nao čuă jơmư, tơña bla hăng bơră ruai hăng ƀing tơhan glăk ngă bruă jao. Amăng hrơi pơ-iă hang ƀơi kual giăm guai, tơhan hơđăp tha rơma kiăo tui lăng rĭm bruă mă mơng ƀing ling tơhan ră anai. Ñu ăt thâo, gah tlôn lŏn klơi đĭ lĕ sa tơlơi čang rơmang dưi ĕp ƀuh ƀing gŏp dưi ba glăi pơ plơi pla.“Kâo čang rơmang ngă hiưm pă kiăng ƀing gŏp dưi ba glăi pơ sang anŏ, dưi ĕp ƀuh lu jing klă hloh. Kâo ƀuh ƀing adơi ayong tơhan glăk hyu ĕp tui anai ăt glêh glar hăng tơnap tap. Lơm pơ-iă hơjan ăt glêh mơn, samơ̆ ƀing gơñu ăt thâo gum hrŏm, anai lĕ tơlơi yôm hloh.”

Mơng tơlơi lăi pơthâo yua tha plơi Siu Pich, ƀing apăn bruă, ling tơhan Kah grup 1, grup K52, Anom bruă kơđi čar, Anom bruă git gai ling tơhan tơring čar Gia Lai hơmâo pơphun pel ĕp, pơsit tong anih hăng pok pơhai bruă hyu ĕp ƀơi kual đang pla boh ñông.

Thượng tá Hoàng Viết Ngọc, Khua grup K52 brơi thâo, truh ră anai, anom bruă hơmâo klơi rŭ đĭ 16 per tơlang tơhan hrŏm hăng lu gơnam yua hơmâo tơlang, tơgơi, akhan čơtăng, jao ling tơhan. Sit biă ñu, amăng mrô anai hơmâo per tơlang hrŏm hăng kơƀang čih anăn tơhan Nguyễn Thanh Trì, djai pơsăn drơi kơnôl 18/5/1970. Anai lĕ tơlơi pơhing yôm phăn, djru brơi hơdôm anom bruă bơdjơ̆ nao tŏ tui ĕp brơi anăn hăng ĕp brơi pô sang tơhan djai pơsăn drơi. “Mơng tơlơi lăi pơthâo mơng ơi Siu Pich, ƀing gơmơi hơmâo nao ĕp lăng, laih anun pơsit tong anih. Ơi Siu Pich lăi amăng thun 1973 hơmâo thâo laih kơ kual anai. Tơdơi kơ pơsit tong ten djơ̆ tơlơi pơkă djop mơta hăng dưi klơi rŭ anun grup hơmâo pơphun hyu ĕp dong mơng kơnôl 5/11 truh ră anai.”

Ƀơi să Ia Dom, gong gai ƀon lan glăk gum hrŏm hăng Grup K52 pơtrut pơsur mơnuih ƀôn sang lăi pơthâo, djru brơi anih hyu ĕp hăng ngă gêh gal brơi bruă hyu ĕp, klơi rŭ đĭ tơlang tơleh tơhan. Tơdơi kơ ĕp ƀuh tơlang, ƀon lan amra pioh anih răk pioh ƀơi anom bruă git gai ling tơhan să kiăng mơnuih ƀôn sang tŭi ñang, hơ-ŭ hơdor ƀing mơnuih djai pơsăn drơi jăn.

Ơi Trần Ngọc Phận, Khua git gai Ping gah să Ia Dom brơi thâo, hơdôm tơlơi lăi pơthâo mơng ƀing tha plơi, khua plơi hăng mơnuih tha rơma hơmâo pơgôp yôm phăn amăng bruă hyu ĕp tơlang tơleh tơhan glăk đih glăi amăng ƀon lan. “Ƀing mơnuih tha rơma, ƀing tha plơi, khua plơi, hơmâo lăi pơthâo brơi hơdôm anih dor tơhan, ƀing gơmơi tŏ tui gum hrŏm hăng grup K52, anom bruă git gai ling tơhan tơring čar amra ngă hiưm pă klă hloh kiăng tơlang tơhan dưi ba glăi pơ plơi pla, pơdah pran hơdor tơngia ƀing ling tơhan djai pơsăn drơi jăn kiăng ba glăi tơlơi rơngai kơ lŏn ia ta.”

Ƀơi Ia Dom, tơlơi bơră ruai mơng ƀing tha plơi, tơhan hơđăp Siu Pich lĕ tơlơi bơră ruai lăi nao rơnuk blah wang ăt dŏ djă pioh amăng pran jua mơnuih ƀôn sang, kơ pran jua ngă gŏp aka ƀu wơr hĭ ôh hăng pran khăp pap ling tơhan hăng mơnuih ƀôn sang kjăp phik ƀơi kual giăm guai. Ƀơi kual giăm guai tơring čar Gia Lai, bruă hyu ĕp ăt glăk tŏ tui na nao. Ƀing tơhan amăng grup K52 ăt gir run kiăo tui kru, mơnuih ƀôn sang ăt gum hrŏm, lăi pơthâo hơdôm tơlơi ƀing gơñu thâo. Abih bang lêng kơ čang rơmang tañ ba glăi tơlang tơhan glăi pơ plơi pla, kiăng pô sang huăi dŏ tơguăn dong tah, kiăng pran khăp pap mơng ƀing gŏp amra bang hyu amăng tơlơi hơdip ră anai./.