Tui hăng tơlơi lăi pơthâo amăng mông jơnum, thun 2022, tơlơi pơhing bơwih ƀong huă mơnuih mơnam amăng tơring čar Dak Lak hơmâo lu tơlơi pơblih klă ƀiă mơ̆n. Abih bang tơhnal pơkă tui Hră pơtrun hơmâo ngă tui djơ̆. Amăng anun 6 mơta tơlơi pơtrun kơ bơwih ƀong huă lĕ đĭ hloh. Rơnoh gơnam sĭ mơdrô yap pơhrui glăi abih bang truh 58.300 klai prăk, đĭ hloh 8,9% pơkă hăng thun 2021. Lu anom bruă, glông bruă hlăk hrưn đĭ hăng djă bong anŏ hơđong pơđĭ kyar, kah hăng bruă ngă hmua pla pơjing, čem rông hlô mơnong, rông akan hơdang, sĭ mơdrô hăng tač rơngiao, pơhưč tuai čuă ngui hăng bơwih bơwăng, akŏ pơjing phrâo sang sĭ mơdrô….lêng kơ đĭ tui soh pơkă hăng thun hlâo.

Bruă mă gah tơlơi pơtô pơjuăt, gru grua hiam, bruă mơnuih mơnam, bruă ia jrao, tơlơi hơdip mơda mơnuih ƀôn sang dưi đing nao git gai ngă tui klă, pơgang lŏn ia, rơnuk rơnua mơnuih mơnam bong kjăp. Hrom boh tơhnal dưi ngă, tơring čar Dak Lak ăt dŏ sa dua tơlơi dŏ kơƀah kah hăng: tơhnal pơkă mrô ngă tơ-ui kyâo amăng glai kơnong dưi ngă 38%. Bruă yua prăk čan tuh pơ alin kơ bruă čar ƀiă kơnong dưi ngă 29,5% akŏ bruă jao; tơlơi kơƀah ia jrao pơjrao duăm ruă, kơƀah gơnam yua pơjrao duăm ruă ƀơi lu sang ia jrao kơnuk kơna aka ƀu pơsir klă, ngă kơ mơnuih ƀôn sang nač biă mă.