VOV4.Jarai - Tơdơi kơ Anom bruă pơgang ba phun pla, Ding jum bruă hmua - pơđĭ kyar ƀon lan brơi thâo, lơ 11/7, Anom bruă wai lăng tơlơi nao rai sĭ mơdrô dêh čar Khač sit nik kĭ hră kiăng pơčrang lăng anŏ klă hăng boh sầu riêng mơng Việt Nam ba sĭ pơ dêh čar anai. Tui anun, boh sầu riêng mơng Việt Nam amra dưi ba sĭ ƀơi abih bang amăng jang dêh čar Khač lơ̆m ngă djơ̆ hăng tơlơi kiăng blơi. Hră pơsit anai dưi mă yua amăng 3 thun. Anai jing tơlơi mơ-ak biă yơh hăng sang anŏ pla sầu riêng dêh čar ta lăi hrŏm, Dak Lăk lăi hơjăn.

Tui hăng Gơnong bruă hmua hăng pơđĭ kyar ƀon lan Dak Lăk, tơring čar hơmâo năng ai 17.000 ektar đang sầu riêng, amăng anun hơmâo năng ai 15.000 ektar mơboh laih; pơhrui glăi năng ai 140.000 tơn. Rim thun hơmâo truh 70% mrô sầu riêng Dak Lăk hơmâo ba sĭ pơ dêh čar Khač tui jơlan sĭ mơdrô ƀu hơmâo hră kĭ pơkôl blơi hlâo.

Siu H’Mai: Pơblang