VOV4.Jarai - Yua bơbeč mơng klin Covid-19, lu čơđai sang hră muai ƀơi Dak Lak ƀu dưi nao sang hră ôh. Biă mă ñu lĕ ƀing čơđai ƀơi plơi prong Buôn Ma Thuột, abih tih hrơi mông hrăm pơ sang hră kơnong 2 wŏt hrơi tơjuh. Kiăng kơ ƀing amĭ ama hơđong pran jua hăng ngă gêh gal brơi ƀing čơđai 5 thun dưi mut hrăm anih 1, gơnong bruă pơtô pơjuăt Dak Lak glăk ngă tui lu hơdră djru brơi ƀing čơđai amăng thun anai.

Thun hrăm 2021-2022, ƀơi sang hră čơđai muai ƀơi plơi prong Buôn Ma Thuột, ƀing čơđai dưi nao hrăm pơ sang hră kơnong 2 wŏt hrơi tơjuh đôč

Kiăng ngă gêh gal brơi ƀing čơđai 5 thun dưi mut hrăm anih 1, Khua gơnong bruă pơtô pơjuăt tơring čar Dak Lak, Phạm Đăng Khoa brơi thâo, gơnong bruă rơkâo djop sang hră hơmâo video črâo brơi ƀing amĭ ama čơđai thâo bruă pơtô hrăm hăng ƀiă mă ñu pơtô brơi čơđai 5 thun hơdeč hmar amăng bruă ngă. Amăng anun, hăng hơdôm boh sang hră hơmâo lu čơđai djuai ania ƀiă, đa hơmâo čơđai pơhiăp tơlơi yuăn aka ƀu rơđah, ƀing nai pơtô kiăng gum hrŏm hăng sang anŏ kiăng kơ djru brơi, črâo brơi ƀing čơđai hrăm pơđok hlâo kơ mut hrăm anih 1.

Siu Đoan: Pơblang