VOV4.Jarai - Bơdjơ̆ nao bruă giăm 100 ektar glai rưng ƀơi tơring glông Lak arăng phă, gơnong bruă ngă hmua hăng pơđĭ kyar ƀon lan tơring čar Dak Lak hơmâo hră pơ-ar rơkâo anom bruă wai lăng glai rưng tañ hơmâo hră pơ-ar kiăng kơ pơsir, ngă rơđah tơlơi soh mơng ƀing mơnuih, khul grup. Tơdơi kơ ƀuh arăng phă giăm 400 ektar glai rưng ƀơi să Ya Tờ Mốt, tơring glông Ea Súp, anom bruă bơdjơ̆ nao tơring čar Dak Lak ƀuh dong bruă phă glai prong ƀơi lu anih anun lĕ hơdôm să: Ia R’vê, Ia Lốp (Ea Súp), să Đắk Phơi hăng să Krông Nô (Lak).

Amăng đơ đam kual glai rưng arăng phă, hơmâo 25 ektar glai rưng lĕ kual glai wai lăng phun. Ơi Nguyễn Quốc Hưng - Khua anom bruă wai lăng glai rưng tơring čar Dak Lak brơi thâo: anai lĕ hơdôm bruă phă glai prong hloh, anom bruă glăk ječ ameč ĕp ƀing mơnuih bơdjơ̆ nao hăng ngă hră pơ-ar kiăng kơ pơsir kơđi. Laih dong, anom bruă wai lăng glai rưng tơring čar ăt amra ngă rơđah tơlơi glăm ba mơng ƀing mơnuih, khul grup bơdjơ̆ nao ngă kơ glai rưng arăng phă mơ̆ ƀing gơñu ƀu ƀuh hăng pơgăn hmao tlôn.

Siu Đoan: Pơblang