VOV4.Jarai - Tlam (9/9), Grup hyu mă bruă mơng Khul git gai gơnong glông jơnum klah čun 10 thun ngă tui tơlơi pơtrun mrô 9/2011 mơng Ding jum kơđi čar amăng pơjing hăng ngă tui pran gơgrong mơng ƀing bơwih ƀong sĭ mơdrô Việt Nam amăng thun blan pơtrut tuh tia pơkra pơjing, pơplih phrâo hăng mut hrŏm jar kmar hơmâo mông mă bruă hăng tơring čar Dak Lak kơ bruă ngă tui tơlơi pơtrun mrô 9 amăng tơring čar. Dak Lak ră anai hơmâo rơbêh 11.100 boh anom bơwih ƀong sĭ mơdrô glăk mă bruă, abih tih rơnoh prăk tuh pơ alin rơbêh 84.000 klai prăk, đĭ 2,7 wŏt pơhmu hăng 2,1 wŏt rơnoh prăk tuh pơ alin mơng anom bơwih ƀong sĭ mơdrô amăng thun 2011.

Amăng mông mă bruă, tơring čar Dak Lak rơkâo djop Ding jum, gơnong bruă kơsem min, rơkâo hơdôm hơdră bruă gum djru, pơtrut anom bơwih ƀong sĭ mơdrô hrưn đĭ bơkơtưn, sit biă ñu hăng hơdôm anom bơwih ƀong ƀơi hơdôm kual tơnap tap. Tŭ mă hơdôm tơlơi pơgôp hiăp mơng tơring čar, ơi Đỗ Ngọc An, Kơ-iăng khua anom bruă bơwih ƀong huă gơnong glông brơi thâo, Dak Lak kiăng hơmâo lu dong mơnuih bơwih ƀong sĭ mơdrô, pơđĭ kyar hăng ngă tui hơdôm tơlơi dưi amăng tơring čar.

Siu Đoan: Pơblang