Thun 2024, tơlơi pơhing rơnuk rơnua, kơđi čar, hơđong mơnuih mơnam ƀơi Dak Lak dưi pơhlôm klă, samơ̆ ăt dŏ lu tơlơi hŭi ba truh tơlơi rung răng mơnuih mơnam. Kơ bruă hơđong kơđi čar amăng kơnuk kơna, hơmâo 81 čô khua apăn bruă, mơnuih ping gah ngă soh tơlơi phiăn. Tơlơi arăng ngă hră ƀom kiơng dŏ lu, pơsir tơnap tap. Kơ tơlơi rơnuk rơnua hơđong mơnuih mơnam, amăng thun laih rơgao hơmâo 1.130 kơđi tơlơi, ngă 21 čô mơnuih djai.

Boh tơhnal bruă mă pơgăn tơlơi soh ƀong kông ngăn thun 2024, tơring čar Dak Lak pơphun hyu ĕp lăng ngă tui djơ̆ tơlơi phiăn pơtrun, pơhaih rơđah rơđong ƀơi 30 boh sang bruă kơnuk kơna. Pơhiăp git gai jơnum, ơi Nguyễn Đình Trung, Khua git gai ping gah tơring čar Dak Lak pơtrun hiăp djop gưl anom bruă, djop sang bruă kơnuk kơna ăt khom djă bong kơjăp tơlơi hơđong bruă kơđi čar, hơđong mơnuih mơnam. Pơtum bruă lăi pơthâo kơ khul khua mua apăn bruă phun ping gah tơring čar, khua mua git gai ping gah tơring čar, kiăng pơčrâo ba ngă tui tŭ yua hloh hơdôm tơlơi pơdjơ̆ nao wai lăng lŏn tơnah, kơđi tơlơi pơdjơ̆ nao mơnuih djuai ƀiă, kual đăo anăm lui ƀing ayăt roh, ƀing pơblư̆ kơnuk kơna pơhmao mă kiăng ngă pơrung pơrăng.