Hră lăi pơthâo hlâo mông jơnum, rơwang bruă anai, Ping gah tơring čar Dak Lak hơmâo pơdah thâo 6 mơta bruă mă, hơmâo 3 bruă mă yôm hloh, amăng bruă pơtrut pơđĭ kyar bơwih ƀong huă mơnuih mơnam. Rơgao 2 thun mơkrah pok pơhai truh ră anai, djop bruă mă hơmâo ngă djơ̆ boh tơhnal pơkă mơ̆n. Rơnoh pơđĭ kyar bơwih ƀong huă đĭ tui, pơkă dưm dưm đĭ rơbêh 7,07%/ sa thun, (akŏ bruă mơ̆ng thun 2020-2025 pơkă dưm dưm đĭ 7,01%/thun); rơnoh gơnam tam sĭ mơdrô dưi ngă 56% akŏ bruă jao; hnong bơwih ƀong huă thun 2023 đĭ lu hloh 1, 2 wơ̆t pơkă hăng thun 2020.

Hrŏm hăng boh tơhnal dưi ngă, ƀơi mông jơnum, ƀing khua mua apăn bruă ping gah tơring čar ăt pơčrâo tong ten anŏ aka dưi ngă, dŏ tơdu amăng bruă ngă tui Hră pơtrun mơ̆ng ping gah tơring čar Dak Lak lơ̆m mơkrah rơwang bruă rơgao kah hăng bruă git gai, wai lăng pơčrâo ba lu anom bruă ping gah, gong gai kơnuk kơna aka ƀu ngă tui khut khăt hmao kru ôh. Bruă mă amăng glông bruă kơđi čar ƀơi anŏ dŏ kơƀah, bruă ngă hrŏm hơdai gum nao rai aka tong ten, lu anih aka ƀu hmao thâo ôh tơlơi pơhing ječ ameč pơgang hơđong rơnuk rơnua kơđi čar, mơnuih mơnam, bruă mă wai lăng, pơgang glai rưng ƀơi lu anih aka ƀu ngă klă ôh...