Ƀơi hơdôm boh să pơ guai lŏn dăo Ia Rvê, Ea Bung, Buôn Đôn hăng Ia Lốp, tơring čar Dak Lăk, ƀing khua plơi, tha plơi, mơnuih ană plơi kơnang, hăng tơhan pơgang guai hơmâo hrăm na nao gah tơlơi pơhing mơ̆ng tač rơngiao, wai lăng lŏn ia, rơnuk rơnua pơ guai; laih dong prăp rơmet bruă pôr pơhing hăng wai lăng rơnuk rơnua plang internet.

Pô pơtô, pơtô brơi bruă brơi nao tơlơi pơhing, sem lăng tơlơi pơhing, čih pơkra glăi dong hlâo či pôr pơhing; thâo krăn, pơsir hĭ tơlơi pơhing soh sat, pơčut pơčao amăng plang internet. Bruă mă yua ia rơgơi ană mơnuih pơčeh hăng boh thâo mrô ăt hơmâo ba pơƀuh, djru ba khul pôr pơthâo amăng plơi pla thâo čơkă hmư̆, hăng ba pôr pơthâo.

Amai Nguyễn Thị Thi, ƀơi thôn 4, să Ea Bung lăi, hơdôm tơlơi hrăm anai dưi hla tui hlao amăng bruă pôr pơhing ƀơi plơi pla: “Mơ̆ng mông jơnum, kâo thâo rơđah hloh tơlơi gơgrong mơ̆ng rim čô mơnuih, amăng bruă bong kjăp rơnuk rơnua, pơgang ba guai dêh čar; laih dong thâo čơkă hmư̆, pôr pơthâo tơlơi pơhing tơpă sit laih anun ƀu hmư̆ tui tơlơi pơhing aka ƀu pơtŏng sit. Tơdơi anai lơ̆m glăi pơ plơi, kâo amra ba pơthâo amăng mông jơnum khul grup, plơi pla, hiăp tom hăng neh met wa, iâu pơthưr abih bang mơnuih ngă tui tơlơi phiăn, gir pơgang rơnuk rơnua, hơđong kjăp hăng wai lăng tơlơi dưi ƀơi guai dêh čar”.

Hrŏm hăng anun, hơdôm mông jơnum ăt djru brơi mơnuih ƀôn sang pơ guai thâo hmư̆ djŏp tơlơi pơhing sit kơ kơđi tơlơi ƀơi guai hăng tơlơi pơtrun bơdjơ̆ nao. Ơi Lê Đình Qúy, Kơ-iăng khua jơnum min mơnuih ƀôn sang să Ia Rvê, tơring čar Dak Lăk brơi thâo: “Anai jing hrơi mông kiăng mơnuih ƀôn sang hmư̆ tơlơi pơhing tơpă sit kơ kơđi tơlơi ƀơi guai, tơlơi rô nao rai giăng mah, ngă hrŏm plah wah Việt Nam hăng Kur ăt kah hăng hơdôm tơlơi pơtrun bơdjơ̆ nao plơi pla pơ guai dêh čar. Mơ̆ng anun, mơnuih ƀôn sang thâo hluh tui, gơgrong bruă pơgang ba lŏn ia, gir bong kjăp plơi pla, thâo gum pơgôp, rô nao rai mơ-ak plah wah mơnuih ƀôn sang dua bơnah guai”.

Ơ Nguyễn Quốc Hiệp, Kơ-iăng khua gơnong bruă gru grua, bơkjăp drơi jăn hăng tuai čuă ngui Dak Lăk lăi, plang pôr pơhing glăk jing sa plang pôr tơlơi pơhing re se mơ̆ng mơnuih ƀôn sang. Yua hnun, hrŏm hăng ba tơlơi pơhing sit kơ plơi pla, bruă thâo krăn hơdôm tơlơi pơhing soh sat, pơčut pơčao ăt jing sa amăng hơdôm bruă yom biă mă. Thun anai, hăng bruă pok prong tui khul pôr pơhing, hăng măi mok, glông pôr pơhing, bruă pôr tơlơi pơhing tač rơngiao hơmâo ngă jê̆ giăm hloh hăng ƀing khua, mơnuih mă bruă kơnuk kơna hăng mơnuih ƀon sang pơ guai dêh čar: “Ƀing gơmơi pok prong truh pơ ƀing khua plơi, tha plơi, ƀing khua mua, mơnuih mă bruă amăng plơi pla, biă ñu lĕ pơ guai dêh čar. Mơ̆ng mông jơnum, gơmơi pơđĭ tui tơlơi apăn bruă mơ̆ng ƀing khua, khul grup kơđi čar hăng mơnuih ƀôn sang pơ guai; pôr pơhing tơlơi hơmâo, tơlơi dưi ngă, hơdôm hơdră pơgang ba guai dêh čar, ăt kah hăng pơgăn hĭ tơlơi pơhing soh sat, ča čot amăng plang mơnuih mơnam ngui ră anai”.

Bruă ba tơlơi pơhing sit amăng plơi pla, laih dong pơđĭ tui tơlơi rơguăt bruă kơ khul pôr pơhing, tha plơi, mơnuih ană plơi kơnang hăng khua mua mă bruă amăng plơi pla hơmâo čang rơmang pơjing rai plang pơtruh gong gai, khul apăn bruă hăng mơnuih ƀôn sang. Mơ̆ng anun, mơnuih ƀôn sang pơ guai dưi sem lăng, pơtŏng sit tơlơi pơhing klă hloh, thâo hluh, răng kơđiăng hăng gum bong kjăp rơnuk rơnua, hơđong kjăp, pơgang ba lŏn tơnah, pơjing guai lŏn ia rơngai, nao rai mơ-ak hăng čar rơngiao.