Hơmâo 8 črăn tơlơi phiăn hơmâo đing nao pơčrông sai, pơgôp hiăp, hơmâo: tơlơi phiăn juă nua man pơdong (čih pơkra glăi); tơlơi phiăn juă nua kông ngăn (čih pơkra glăi); tơlơi phiăn sang dŏ (čih pơkra glăi); tơlơi phiăn pơđĭ kyar anom bơwih ƀong sĭ mơdrô anet hăng man ƀrô; tơlơi phiăn pơplih pơkra, pơhrua sa, dua črăn amăng tơlơi phiăn sĭ mơdrô, tơlơi phiăn bơkơtưn, tơlơi phiăn wai lăng sĭ mơdrô, tơlơi phiăn wai pơgang tơlơi dưi mơnuih blơi yua; tơlơi phiăn rơkâo blơi glăi, mă yua kông ngăn; tơlơi phiăn čih pơkra, pơhrua sa, dua črăn amăng tơlơi phiăn rơnuk rơnua, agaih rơnăk anih mă bruă; hăng črăn tơlơi phiăn pơplih pơkra, pơhrua sa, dua hơdôm tơlơi phiăn kơ bruă bơrơguăt drơi jăn, tuai čuă ngui, anih pơđok hră, pơdah phim, gru grua, pơƀuh pơthâo, pôr pơhing.

Sit biă ñu lĕ kơ črăn tơlơi phiăn čih pơkra, pơhrua sa, dua črăn amăng tơlơi phiăn rơnuk rơnua, agaih rơnăk anih mă bruă, ƀing khua mua rơkâo pok prong mơnuih mut hrŏm blơi hră pơhlôm pơgang mơnuih mă bruă, tơlơi ruă bơdjơ̆ nao bruă mă khŏm blơi pơlir hăng hơdôm tơhnal pơkă djru brơi lăp djơ̆. Tui anun, kiăng kơsem min tơlơi pơkă tong ten ngăn rơnoh djru brơi prăk klơi mơng mơnuih mă bruă ƀu hơmâo hră pơkôl mă bruă dong amăng sang anŏ ƀun rin, giăm ƀun rin ƀudah dŏ hơdip amăng kual mơnuih djuai ania ƀiă.