Ƀơi mông ngă bruă, khua mua ƀon prong Hà Nội lăi pơthâo glăi hơdôm hơdră kiăng đĭ kyar mơ̆ng 11% pơngŏ amăng thun 2026; pơtŏng glăi bruă hnăng blung ngă tui tơlơi dưi hơmâo jao amăng Tơlơi phiăn Plơi prong jưh jom laih anun tơlơi rơkâo đĭ mơ̆ng ƀon prong hăng mông Jơnum lok dua, Khua pơ ala mơnuih ƀon sang dêh čar tal 16.

Pơhiăp ƀơi mông ngă bruă, Khua ping gah, Khua mir sir ơi Tô Lâm lăi dlăm, kiăng ngă bơrơđah djŏp tơlơi pơtrun yom mơ̆ng Ping gah, pơđĭ tui tơlơi rơgơi wai lăng, đĭ kyar lŏn ia; kơsem min hơdôm kơčăo bruă amăng abih bang hơdră djru, hră pơtrun ngă bruă; tơlơi pơkôl pơkă anŏ gêh găl kơ bruă tuh pơ alin khŏm hơmâo djru hăng tơlơi phiăn, hăng tơlơi phiăn lŏn sang đang hmua, tơlơi phiăn prăp rơmet pơkă hơnong bruă či ngă, laih anun man pơdong bơkơnar. Khua ping gah, Khua mir sir lăi dlăm, hơdôm tơlơi pơsit kơ prăk kăk pioh či đĭ kyar khŏm nao hrŏm hăng anŏ hơđong kjăp, laih anun pơđĭ tui tơlơi hơdip mơnuih ƀon sang; pơtrut tui tơlơi gơgrong mơ̆ng Plơi prong jưh jom, mơ̆ng tơlơi hơmâo sit mơ̆ng Hà Nội, pơgôp ngă giong hơdră ngă bruă hrŏm; krăo lăng boh tŭ yua lơ̆m ngă tui tơlơi ƀuăn hăng mơnuih ƀon sang ruah khua.