Hơdră bruă hlăk ai djru mơnuih bơyan pơdơi prong thun 2026 ƀơi Dak Lak pơhưč rơbêh 130.000 wŏt hlăk ai mut hrŏm, hăng giăm 4.000 bruă djru mơnuih mơnam. Hơdôm grup djru bruă bơyan pơdơi prong mơta hơmâo ngă 144 ring bruă, bruă jao hăng prăk mă yua giăm 2 klai prăk. Bruă bơwih brơi ƀing čơđai hơmâo pok pơhai 318 anih luai ia soh sel hăng giăm 5.000 anung prăk djru hrăm hră jao brơi ƀing čơđai sang anŏ tơnap tap.

Abih bang 102 boh să, phương amăng tơring čar lêng kơ pok pơhai grup djru mơnuih ƀôn sang yua boh thâo phrâo, djru hrưn đĭ thâo yua boh thâo mrô, pơplih ngă hră pơ-ar hăng ƀu kiăng duh prăk mơta brơi rơbêh 145.000 wŏt hlăk ai čơđai, mơnuih ƀôn sang.

Tơdơi kơ bruă djru bơyan pơdơi prong, bruă djru mơnuh ƀôn sang yua boh thâo phrâo tŏ tui pơtrut kơtang amăng hơdră ngă bruă 44 hrơi mlăm “Hlăk ai Dak Lak ba jơlan hlâo pơplih mrô”. Hơdôm grup hơmâo djru ngă tui rơbêh 64.700 pok hră pơ-ar amăng măi mok, črâo ba rơbêh 27.200 boh sang anŏ bơwih ƀong, ƀing si mlia mă yua kru mrô QR kiăng mơ-it prăk ƀudah bruă sĭ mơdrô gơnam amăng internet.

Tui ơi Y Lê Pas Tơr, kơ-iăng Khua khul hlăk ai tơring čar, Khua khul pơlir hlăk ai Việt Nam tơring čar Dak Lak, hơdôm grup anai glăk đing nao črâo ba kiăng tơdơi kơ djru brơi, mơnuih ƀôn sang dưi ngă tui amăng măi telephôn pô. “Tơdơi kơ bruă djru bơyan pơdơi prong, ƀing gơmơi ăt brơi ƀing hlăk ai tŏ tui hơdôm bruă mă, tơdơi kơ bruă “bơyan pơdơi prong mrô” hơdai nao hơdră ngă bruă 44 hrơi mlăm, ƀing hlăk ai tŏ tui hơdôm bruă mă mơng ƀing gơñu. Ƀing gơmơi ăt git gai tơdơi kơ hơdôm hơdră ngă bruă pơprong anai, anai ƀu djơ̆ bruă jao mơng pô pơđut hĭ ôh mơ̆ bruă djru ba ƀơi ƀon lan, ƀơi anom bruă, sit biă ñu lĕ bơdjơ̆ nao bruă pơplih mrô lĕ bruă jao tŏ tui na nao hăng kiăng pơlir hăng hơdôm bruă jao, hơdôm tơlơi git gai mơng gưl Ping gah hăng gong gai ƀon lan dong.”./.