Tal pơplông abih anih 12 dêh čar thun 2023 pơphun amăng rơwang hrơi tơjuh pơ anăp, đơ đam tơring čar Dak Lak hơmâo rơbêh 21.000 čô čơđai čih anăn nao pơplông ƀơi 33 boh sang hră hăng abih tih 900 anih pơplông. Kiăng pơhlôm brơi apui lơtrik yua hơđong amăng tal pơplông, hơdôm anom bruă apui lơtrik Dak Lak hơmâo pơphun pel ĕp abih bang glông hrĕ apui lơtrik, prap lui lu hơdră mă yua apui lơtrik brơi hơdôm anih pơphun pơplông.

Tui anun, hơdôm anom bruă kơtưn pel ĕp, pơkra ming glông hrĕ apui lơtrik, anih dưm biến áp bơdjơ̆ nao bruă mă yua apui lơtrik pioh in tơlơi pơplông, hơdôm anih pơphun hăng čom puang; kah hăng gum hrŏm pơsir hĭ hơdôm anŏ aka ƀu klă amra ngă tơnap lơ̆m mă yua apui lơtrik. Gơnong bruă ăt prap lui mơnuih wai lăng tơhrơi kah hăng mlăm hăng gơnam măi mok kiăng hmao tlôn nao pơkra ming tơdah hơmâo tơlơi hơget. Laih dong, hơdôm anom bruă apui lơtrik ăt gơgrong mă bruă, gum hrŏm hăng hơdôm anom bruă bơdjơ̆ nao kiăng kơtưn hơmâo hơdră wai lăng, pơhlôm hơđong amăng tal pơplông.