VOV4.Jarai - Amăng blan 6 hăng blan 7 laih rơgao, kông ti apui lơtrik Dak Lak hơmâo pơphun truh kih hơdôm jơlan hơdră pơtô pơblang kơ bruă pơhlôm rơnuk rơnua lơ̆m yua apui lơtrik tơl sang anŏ ƀing apăn bruă, mơnuih mă bruă ƀơi 16 anom bruă apui lơtrik hăng hơdôm grup bơwih ƀong pơkra pơjing. Bruă anai kiăng ngă lar hyu hăng hrưn đĭ tơlơi pơmĭn kiăng pơhlôm rơnuk rơnua lơ̆m mă yua apui lơtrik amăng bruă bơwih ƀong sĭ mơdrô.

Anai lĕ tal blung a tơring čar Dak Lak hơmâo pơphun hơdôm jơlan hơdră pơtô pơblang kơ bruă pơhlôm rơnuk rơnua lơ̆m yua apui lơtrik tơl sang anŏ ƀing mơnuih apăn bruă, mơnuih mă bruă amăng đơ đam tơring čar. Tui anun, hrŏm hăng bruă pơdah rup hăng hơdôm tơlơi bơră ruai kơtuai hăng anăn “SOS - Pơhlôm rơnuk rơnua hlâo kơ mut amăng sang”, hơdôm rup rap pơtô pơblang ƀơi anăp amăng djop plơi pla ala ƀon, khua mua kông ti apui lơtrik Dak Lak ăt hơmâo bơră ruai hrŏm, đing tơngia hmư̆ hăng lăi glăi hơdôm tơlơi tơña mơng sang anŏ mơnuih apăn bruă. Jơlan hơdră hơmâo tơlơi mut hrŏm, ngă lar hyu hăng hrưn đĭ amăng tơlơi pơmĭn kơ bruă pơhlôm rơnuk rơnua amăng bruă mă mơng rĭm boh sang anŏ. Amai Trần Thị Hiền, bơnai ayong Nguyễn Xuân Bắc, mơnuih mă bruă gah anom bruă apui lơtrik Lak brơi thâo:

“Mơng hrơi pơtô pơblang anai ngă kơ kâo thâo hluh rơđah dong kơ bruă mă mơng rơkơi kâo. Sang anŏ amra pơ alum pran jua ñu, pơsur ñu mă bruă klă hloh, kiăng kơ đing nao bruă mă hăng bruă pơhlôm rơnuk rơnua ƀiă dong”.

Mông gơnong bruă apui lơtrik pơtô pơblang brơi mơnuih ƀon sang

Bơ amai Lê Thị Mỹ Hạnh, bơnai ayong Đàm Thanh Cao, mơnuih mă bruă gah anom bruă apui lơtrik Dơnung Buôn Ma Thuột brơi thâo:

“Kâo hluh rơđah boh tơhnal bruă mă mơ̆ rơkơi kâo glăk ngă, sit biă ñu lĕ bruă pơhlôm rơnuk rơnua amăng gơnong bruă apui lơtrik kiăng pơhlôm djơ̆ hăng tơlơi pơkă hiưm pă thơ. Ƀing gơmơi kiăng thâo hluh rơđah kiăng kơ djru brơi ñu, mơ̆ kâo ăt kiăng pơtô pơblang brơi kơ ayong adơi, kơnung djuai pơkŏn kiăng thâo hluh rơđah kơ bruă anai”.

Kông nhơn gơnong bruă apui lơtrik amuñ bưp tơlơi hŭi rơhyưt lơ̆m mă bruă

Ơi Trần Tấn Phùng, Khua khul mơnuih mă bruă mut phung, Kơ-iăng khua kông ti apui lơtrik Dak Lak brơi thâo, hluai tui jơlan hơdră anai, kông ti čang rơmang rĭm čô mơnuih amăng sang anŏ kông nhơn mă bruă gah gơnong bruă apui lơtrik ăt jing mơnuih hyu pơtô pơblang, pơtă pơtăn rĭm hrơi kơ hơdôm tơlơi hŭi rơhyưt amăng bruă mă. Laih dong kông ti ăt rơkâo hơdôm anom bruă pok hơdôm grup zalo hơmâo mơnuih amăng sang anŏ kiăng kơ abih bang mơnuih dưi lăi pơthâo hrơi mông mă bruă, rơkâo pơgôp hiăp hăng gum hrŏm amăng bruă pơhlôm rơnuk rơnua amăng bruă mă.

“Bruă tơnap phara mơng gơnong bruă apui lơtrik tơdah hơmâo tơlơi truh sat amra pơkra ming mơtăm yơh mah mơmŏt mlăm, ăt čang rơmang mơnuih amăng sang anŏ gum hrŏm lăi pơthâo. Dua dong lĕ kiăng pơhlôm rơnuk rơnua amăng bruă mă mơng gơnong bruă apui lơtrik ăt kiăng hơmâo djop mơta mơn, amăng anun kiăng rang kơđiăng. Gah kông ti ăt kiăng pơtô pơblang tơl mơnuih amăng sang anŏ mơng anun lăi pơthâo hơdôm bruă amăng sang anŏ kiăng mơnuih mă bruă huăi pơtah tai lơ̆m ƀơi anih mă bruă mơng anun amra pơhlôm rơnuk rơnua ƀiă dong”.

Hơmâo thâo tơdơi kơ hơdôm wŏt pơphun jơlan hơdră anai, PC Dak Lak amra lăng glăi, hơmâo tơlơi găn rơgao kiăng pơjing boh tơhnal jê̆ giăm, lu ƀiă dong brơi kơ hơdôm tal pơtô pơblang kiăo tui anun hăng hơnong pơkă tuč rơnuč lĕ pơhlôm rơnuk rơnua lơ̆m mă bruă.

Siu Đoan: Pơblang