VOV4.Jarai - Mơng akŏ thun truh ră anai, hơdôm anom bruă apui lơtrik ƀơi Dak Lăk hơmâo ƀuh rơbêh 1.000 wơ̆t arăng mă yua apui soh tơlơi phiăn. Amăng anun, kơnong bruă arăng dŏp apui hơmâo 58 wơ̆t, pơhrui glăi rơbêh 900 klăk prăk. Laih dong, hơdôm anom bruă ăt mă yua măi mok sem lăng mrô apui mă yua mơng ataih, krăp lăng mrô apui yua, ƀuh anŏ phara, ƀu djơ̆ mơng ƀing tuai yua apui lơtrik.

Bruă anai djru plai ƀiă hơmâo tơlơi truh sat lơ̆m mă yua apui. Thun anai, tơring čar hơmâo ƀuh 54 tal mrô apui hơmâo mă yua tŭ kơ lu đơi, yua răm hrĕ apui gah tlôn kông tơ, hmao tlôn djru brơi mơnuih yua apui, pơhlôm mă yua apui rơnuk rơnua.

Arăng sem lăng hrĕ apui răm gah tlôn kông tơ ƀơi thôn 4, să Ea Nam, Ea Hleo.

Siu H’Mai: Pơblang