Ƀing ngă mă, gơñu pơ anăn mơnuih mă bruă apui lơtrik, lăi pơthâo či mă hnưh prăk yua apui lơtrik, pơhŭi pơthăm apui lơtrik, kiăng ƀing tuai yua apui lơtrik khom tla prăk tañ, mơ-it nao amăng rơnoh prăk tui mrô gơñu lăi brơi; ƀudah brơi kơtit gư̆ nao amăng anăn gru lơ̆m telephôn pioh tla prăk tui jơlan mơ-it hăng telephôn, kiăng ĕp lăng mrô prăk tuai yua apui lơtrik mơ̆ng sang bruă prăk, laih anun gơñu dŏp mă rơnoh prăk lu, pô prăk amra rơngiă soh sel ƀu thâo ôh. Kông ty apui lơtrik Dak Lak lăi pơtong, abih bang ƀing mă bruă amăng sang bruă apui lơtrik lĕ, hơmâo pơtruh brơi hăng ƀing tuai apah yua apui lơtrik ngă djơ̆ tơlơi pơtrun pơjĕ giăm hăng tuai apah prăk tong ten biă mă, ƀu hơmâo tơlơi pơhiăp kơtang đok, jơloh jơle mơnuih ƀôn sang, laih anun pơtô brơi mơnuih yua apui lơtrik hăng jua pơhiăp rơnang, rơ-un tơdu laih anun ƀu lăi brơi mut ĕp lăng jơlan link amăng plăng internet tă tăn ôh ƀudah amăng măi telephôn djă hyu thâo.

Anom bruă apui lơtrik Dak Lak pơtă pơtăn mơnuih ƀôn sang khom kơđiăng, anăm brơi ôh tơlơi pơhing anăn păn, mrô mơ-it prăk, hră kak ta pơmut amăng măi telephon tă tăn. Sit hmư̆ arăng iâu, čih tơlơi pơhing mơ-it nao, ta đing đăo ƀing soh sat lĕ, khom iâu telephon lăi pơthâo kơ anom bruă apui lơtrik hăng mrô 19001909 ƀudah nao lăi pơthâo pơ anom bruă apui lơtrik giăm hloh ƀơi plơi pla, anih dŏ kiăng tơña lăng hăng hmư̆ lăi glăi tong ten hŏ.