Tơdơi kơ jơnum čơkă jum sit nik, ơi Lương Cường Khua mir sir dêh čar ta hăng Khua mir sir Peru yă Dina Ercila Bluarte Zegarra hơmâo mông pơbưp anet ƀiă mơnuih, hăng tơdơi kơ anun, ba jơlan hlâo grup khua mua pơprong dua bơnah hlong bơkơtuai nao rai kiăng ngă kơjăp tui atur bruă kơđi čar hiam klă dua bơnah, pơđĭ tui boh tŭ yua ngă hrŏm gah bruă mă gêh găl hăng anăp ba tơlơi ngă giăng mah đĭ nao amăng sa yak phrâo.

Hlâo kơ anun, Khua mir sir ơi Lương Cường hăng grup khua mua pơprong mơ̆ng Việt Nam hơmâo nao dưm guang bơnga ƀơi Gong kut rup trah hơdor kơ ƀing tơhan pơsăn drơi jăn yua kơ djuai ania hăng Mơnuih rơgơi kơhnâo akŏ pơdong tơlơi rơngai ƀơi plơi prong jưh jom Lima.