VOV4.Jarai-Hơdôm tơdron anih ngui ngor dưi pơhrôp hiam hăng lu ia iom, pơphun brơi kơ čơđai muai ngui ngor  amăng lan sang hră ƀudah amăng anih phun tong krah plơi pla ƀing čơđai hok mơak biă mă. Hăng tơlơi kiăng djru kơ čơđai anet hơmâo anih dŏ ngui, mơak, tơpư̆ hlư̆ pơkjăp drơi jăn, lu anih čơđai ngui hơmâo pok pơhai ƀoiw djop plơi pla ala ƀôn kual ataih tơring čar Dak Lak hlâo kơ ngă yang thun phrâo djuai ania ta thun anai.

Hơdôm hrơi pơdơi ngă yang thun phrâo Nhâm Dần, mah krah adai pơđiă kơtang hai, ƀing čơđai anet ană amôn ƀôn Kruê̆, să Vụ Bổn, tơring glông Krông Pač, tơring čar Dak Lak ăt pơtum lu ƀơi lan sang hră gưl sa Phan Bội Châu kiăng ngui mơak, čơđai pơphul rah, dưm truă gơnam djă ngui rah. Hlâo kơ anun 2 wơ̆t hrơi tơjuh đôč, pơ anai arăng dưm anŏ ngui, toh hroh kơnang kơsu dơnar hiam biă mă, anŏ đĭ tung tai hơdai nao rai, đĭ tơdrông tua wê̆ wŏ aneng anuang čun čue…tơlơi anun ngă kơ čơđai hok mơak biă mă, kiăo tơdruă ngui ngor. Amôn Lê Trần Linh Chi, djuai ania Tày, sang gơñu giăm anih dŏ ngui anun, hok mơak lăi:

“Hlâo adih aka ƀu hơmâo anih ngui ôh, ră anai hơmâo laih bơni kơ ƀing neh met, nai pơtô hrăm hră brơi pơkra ming anih ngui anai, hơmâo tơdron boh lông, hơmâo tơdrông tua toh hroh kơ gơmơi ngui, mơak biă mă, bơni lu biă mă. Kâo juăt jak gơyut rai ngui hrom”.

Ƀing čơđai muai anet hok mơak biă mă nao ngui bơtơpư̆ drơi jăn

Ăt hok mơak hrup anun mơ̆n, amôn Vi Y Quyền, djuai ania Êđê, čơđai sang hră anih 5 B, sang hră gưl sa Phan Bội Châu ră ruai, sang âtih mŏng sang hră giăm 1km, samơ̆ dơ̆ng mơ̆ng hơmâo anih ngui ƀơi tơdron lan sang hră, mah amăng bơyan pơdơi mơak thun phrâo anai, rĭm hrơi mơtam ñu nao pơ anun ngui đĭ tung tai, hroh tơnang anŏ ngui hăng gơyut gơyâo.

"Hrơi anai, kâo mơak biă mă, hlâo adih aka ƀu hơmâo anih ngui mơak djơh hăng anai ôh, anun ră anai kâo mơak biă mă. Dưi thâo ƀing nai, ƀing met ngă nai pơtô pơ anai ba rai anŏ ngui ngă mơak ƀơi anai, kâo gir run hrăm hră thâo hloh”.

Hơdôm čơđai pơkŏn hok mơak hăng bruă kač rup, pơhrôp hiam

Tui hăng nai Trần Hải Đường, Khua sang hră gưl sa Phan Bội Châu, sang hră pơdong ƀơi ƀôn Kruê̆, ră anai hơmâo 5 boh anih hrăm hăng 100 čô čơđai sang hră, abih bang lêng kơ mơnuih djuai ƀiă soh. Anai lĕ sa amăng hodôm sang hră pơ kual tơnap tap hloh să Vụ Bổn. Hlâo adih, rơngiao kơ mông hrăm hră, čơđai sang hră juăt nao hrom amĭ ama pơ hmua đang, ƀudah hyu kiă rơmô, kơbao, hyu pơnah čĭm brĭm keng kuai, či tlam lĕ čưng boh lông amăng tơdron rơ̆k gah plơi.

Dơ̆ng mơ̆ng hơmâo anih ngui ngor, lan sang hră dưm truă gơnam pioh ngui ngă kjăp drơi jăn, ƀing čơđai nao ngui pơ anai yơh, mơak hăng rơnuk rơnua.

“Hơmâo laih anih ngui ngor djơh hăng anai gơñu amra rai pơ anai re se hloh, dua lĕ kơtưn bruă ngă pơkjăp drơi jăn, kiăng kơtang drơi jăn pran jua kơ ƀing adơi đeh. Tơdơi kơ tŭ mă ring bruă anai, arăng jao glăi lĕ khua mua amăng sang hră hrom hăng khul grup tơdăm dra sang hră laih anun tơdăm dra amăng plơi jơnum glăi pioh djru wai lăng brơi klă hiam hloh”.

Anih ngui ngor ƀơi ƀôn Kruê̆ lĕ ring bruă tal 3 mơ̆ng kơčăo bruă “Tơdron ngui ngor kơ adơi” yua kơ khul djru pơyơr pran jua pơtruh brơi mơ̆ng Ƀuôn Ma Thuôt jak iâu mơnuih mơnam  djru hrom man pơdong,ming pơkra, hăng rơnoh prăk 30 klăk. Amai Lê Như Huyền Trâm, Khua khul djru tơlơi khăp pap pơtruh brơi Ƀuôn Ma Thuôt lăi, amăng bruă mă hyu ĕp lăng ƀơi lu plơi pla tơnap tap, djop plơi kual ataih ñu ƀuh ƀing adơi đeh čơđai muai pơ anai, kual ataih tơnap tap yua ataih mơ̆ng plơi prong, ƀu hơmâo anih ngui ngor mơak ôh.

Ƀing adơi đeh pơkŏn hor đĭ tung tai hơdai nao rai yôt hăng tơkai

Rơngiao kơ mông hrăm hră, ƀing adơi đeh čơđai sang hră juăt bơjak hyu pơnah čĭm, mơnơi ia dơnao ƀudah, ia krông, ia čroh hnoh anun yơh hŭi biă mă ƀlung ia. Ƀơi anăp kơ tơlơi anun, khul hơmâo ngă hrom khua mua gong gai plơi pla, djru ming pơkra anih ngui ngor kơ čơđai muai. Hrom hăng anun, djop anih anom pơkra ming tơdron kơ čơđai ngui ngor, djop sang bruă ăt pơtruh brơi tơlơi pơhing, pioh djru gơnam, mơnong ƀong huă ƀudah sum ao nao ƀơk kơ mơnuih ƀôn sang, hơdrôm hră hrăm brơi kơ  ƀing čơđai muai tơnap tap. Anai lĕ kơčăo bruă sui thun laih anun ăt pok pơhai dơ̆ng mơ̆n tơdơi kơ hrơi ngă yang thun phrâo Nhâm Dần. Amai Lê Như Huyền Trâm lăi:

“Amăng thun 2022 amra hơmâo 10 kơčăo bruă pơkra tơdron anih ngui ngor kơ čơđai muai ƀơi lu tơring glông hơmâo să ƀun rin aka ƀu hơmâo anih pioh kơ čơđai ngui amăng tơring čar Dak Lak. Khul djru hrom gơmơi iâu pơthưr ƀing mơnuih pơdrong čơmah, tơdah ƀu djop prăk lĕ ƀing ding kơna amra pơčruh dơ̆ng pioh ming pơkra anih ngui ngor pioh kơ čơđai muai”.

Hăng tơlơi gum tơngan hrom mơ̆ng djop sang bruă, anom bruă, khul grup, amăng 5 thun rơgao, kơnang kơ Khul tơdăm dra mut phung, tơring čar Dak Lak hơmâo ming pơkra giăm 200 tơdron, lan sang hră anih kơ čơđai ngui rơnuk rơnua, hăng rơnoh prăk truh 10 klai prăk. Rĭm boh tơdron ngă anih ngui ngor kơ čơđai sit ngă giong laih hlong mă jao kơ sang hră, gong gai kơnuk kơna mơnuih ƀôn sang anih anun tŭ mă wai lăng, ngă gêh găl brơi kơ čơđai muai ană amôn nao ngui mơak. Mơ̆ng anun, djru kơ čơđai muai hơmâo dơ̆ng anih ngui, ngă mơak sit nao hrăm hră pơ sang hră.

H’Xíu Hmŏk pô čih-Nay Jek: Pơblang