Tui hăng akŏ bruă rơwang thun 2026-2030, anăp nao truh pơ thun 2050, Dak Lăk prăp rơmet akŏ pơdong 3 kual bơwih ƀong, amăng anun hơmâo Kual bơwih ƀong Dơnung Phú Yên, Kual bơwih ƀong phara hơjăn gah Yŭ hăng Kual bơwih ƀong bah amăng jang Dak Ruê. Laih dong, tơring čar hơmâo prăp rơmet man pơdong 31 kual sang măi tuh tia pơkra gơnam ƀơi đơ đam lŏn rơbêh 8.900 ha. Khă hnun, ră anai kơnong hơmâo 7 kual sang măi hăng 21 boh sang măi hơmâo prăp rơmet pơkă hơnong rơđah rơđông, tuh pơ alin; amăng anun aset đôč sang bruă apah mă yua lŏn 100% mơtăm.

Tui hăng ơi Đỗ Bá Phủ, Khua anom bruă pơtrut pơsur sĭ mơdrô (Ding jum pơkra gơnam hăng sĭ mơdrô), kiăng pơđĭ tui boh tŭ yua tuh pơ alin hăng anŏ pơhưč mơ̆ng hơdôm kual sang măi pơkra gơnam, Dak Lăk kiăng đĭ kyar anih anom jơlan nao rai dưm kơnar, pơtruh kjăp hăng logistics pơlir kual hăng hơdôm apui yua hơdjă. Tơlơi anai ƀu kơnong djru plai ƀiă rơngiă prăk tuh pơ alin đôč ôh ăt pơđĭ tui boh tŭ yua  ngă bruă sui thun: “Hơdôm kual sang măi anai khŏm dưm amăng hơnong pơkă ngă bruă logistics pơlir kual, pơtruh Ngŏ - Yŭ, plah wah Dap Kơdư hăng tơdrun ia rơsĭ. Kiăng pơkrem apui yua, hơdôm kual , sang măi hơmâo pơkă či man pơdong phrâo khŏm hơmâo pơplih pơƀut ha anih, ngă gêh găl kiăng đĭ kyar kơčăo bruă apui yua hơdjă amăng kual, ƀut sang măi. Tơdah ƀu dưi man pơdong, pơtruh hrŏm ôh, jing bruă tuh pơ alin amra lu tui, huač prăk kơnuk kơna, laih dong ngă tơnap kơ anom bruă apui lơtrik mơn".

Sit nik brơi ƀuh, anŏ kơđông prong hloh ră anai mơ̆ng Dak Lăk ƀu kơnong ƀơi anih anom sang măi pơkra gơnam đôč ôh, ăt ƀơi anŏ dưi pơtruh logistic hăng tơdun kom păn, tơdron rơdêh por hăng bruă pơdŭ pơgiăng pơkŏn. Lơ̆m prăk apah ngă logictics dŏ pơmă, hrơi pơgiăng dŏ sui, anŏ gêh găl mơ̆ng anih pơkra gơnam tơnap biă mơưng dưi pơhno nao rai mơ̆ng anom bruă pơkra gơnam klă hloh hăng măi mok.

Đại tá Nguyễn Thành Sơn, Khua khul wai lăng kông ti pơčruh ngăn tơdrun kom păn Cát Lái (ƀôn prong Hồ Chí Minh) lăi, logistics jing “arăt drah” mơ̆ng tơlơi bơwih ƀong. amăng anun, Dak Lăk ăt kơnang kơ jơlan pơgiăng gơnam gah kơdư đôč; bơ ia rơsĭ hăng rơdêh por aka ƀu dưi mă yua klă ôh. Yua hnun, tơring čar kiăng tañ akŏ pơdong anih logistics phrâo đah mơ̆ng huăi rơngiă đơi prăk laih anun pơdŭ pơgiăng gơnam hruaih ƀiă: “Hră tui mơ̆ng jar kmar, ƀing ta khŏm ba gơnam nao pơ tơdrun gah kơdư, jing ƀing ta nao rai tañ hloh. Amăng logistics, tơdrun hăng kơdư jing anih pơgiăng dua bơnah, jing anih djă pioh, dưm amăng hru, pơgiăng yu gơnam, ăt jing anih ngă pơmă tui nua mơ̆ng gơnam pơkra rai mơn. Tơdrun hăng kơdư jing anih ba gơnam pơ čar rơngiao. Kâo ƀuh ƀơi Dak Lăk, anih hiam hloh lĕ pơ să Ea Ô, ataih mơ̆ng Khánh Hòa năng ai 60km, djơ̆ biă hăng bruă logistics”.

Tơdơi kơ pơmut hrŏm, Dak Lăk hơmâo rơbêh 18.000km2, dong tal 3 amăng đơ đam čar, pơƀut hơmâo anih ngă hmua prong gah Yŭ hăng tơdrun kom păn ia rơsĭ, sang măi, bơwih ƀong mơ̆ng ia rơsĭ gah Ngŏ. Tơlơi mut hrŏm anai pok rai tơlơi gêh găl jing ruăi pơkra gơnam sa hơnong mơ̆ng akŏ truh pơ tlôn krĕp mơtăm. Khă hnun, kiăng pơjing anŏ gêh găl anai jing rơnoh đĭ kyar, tơlơi kiăng gah sang măi, anih anom, jơlan nao rai hăng logistics khŏm hơmâo pơsir sa hơnong mơn.

Tui hăng ơi Đào Mỹ, Kơ-iăng khua Jơnum min mơnuih ƀôn sang tơring čar Dak Lăk, tơring čar pơƀut pơplih ngă hră, ngă pơgiong sang măi pơkra gơnam, tuh pơ alin man pơkra anih anom tơdrun  ia rơsĭ hăng logistics đah mơ̆ng hơmâo tơlơi pơplih prong pơkra gơnam hăng măi mok klă hloh hlâo či ba sĭ laih anun pơđĭ tui anŏ yom gơnam ba sĭ pơ tač rơngiao: “Gơnong bruă pơkra gơnam hăng sĭ mơdrô, Khul wai lăng Anih bơwih ƀong Phú yên hăng hơdôm anom bruă bơdjơ̆ nao pơƀut glăi djŏp tơlơi pơčrông sai, pơgôp hiăp mơ̆ng mông jơnum či lăi pơthâo kơ Jơnum min mơnuih ƀôn sang tơring čar hơmâo tơlơi git gai brơi rơđah. Lăi pơthâo hơdôm kơčăo bruă akŏ phun, anih anom, jơlan nao rai, kual sang măi pơkra gơnam tong ten hăng logistics rơwang thun 2026-2030 kiăng dưi ngă pơhưč bruă tuh pơ alin. Kiăng hơmâo hơdră djru phara kơ lŏn ia, prăk čan, pơtrut pơkra gơnam hăng măi mok, djru mă yua boh thâo mrô, mă bruă rơgơi ăt kah hăng Gơnong dlông sem lăng, pơtrun hră pơ-ar brơi lăp djơ̆ kơ sang bruă mơdrô”.

Tơlơi gêh găl kơ anih anom prong rơhaih, hăng dưi pơtruh pơ ia rơsĭ kơnong dưi ngă tui klă lơ̆m hơmâo pơtruh hăng boh thâo logistics rơnuk phrâo hăng anih anom jơlan nao rai ƀơi sang măi hơmâo ngă bơkơnar. Hăng jơlan gah čih pơkra giong bruă prăp rơmet, man pơdong, đĭ kyar hơdôm anom bruă logistics, pơtrut pơkra gơnam tong ten klă hloh, hăng pơhưč sang bruă tuh pơ alin, Dak Lăk ƀơ ƀrư̆ ngă bruă dưi hơmâo laih rơnoh đĭ kyar phrâo kơ măi mok pơkra gơnam hăng logistics mơ̆ng kual Dap Kơdư - Dơnung Tong Krah./.