Lăi pơtong kơ bruă pơhlôm gêh gal brơi bruă pơđĭ ktar mơng dua anom bruă čih pơkra phiah phiăn, Khua git gai pơ ala mơnuih ƀôn sang dêh čar Việt Nam rơkâo dua bơnah kơntưn gum hrŏm amăng pơtrut pơsur, krăo lăng amăng bruă bơkơtuai, kĭ tơlơi pơkôl hăng pok pơhai ngă tui hơdôm pok hră pơ-ar, tơlơi pơkôl atur phun anun lĕ tơlơi pơkôl ngă hrŏm kơplah wah dua kơnuk kơna, tơlơi pơkôl bĕ hĭ mă jia dua wŏt hăng tơlơi pơkôl pơtrut pơsur hăng wai pơgang tuh pơ alin.

Dua bơnah bơtŭ ư kơtưn pơlăi nao rai tơlơi pơhing, kiăo tui lăng hmao tlôn hơdôm hơdră bruă hăng tơlơi pơkă phrâo mơng dua bơnah, sit biă ñu lĕ hơdôm hơdră bruă bơdjơ̆ nao bruă sĭ mơdrô pơ tač rơngiao, pơhưč tuh pơ alin mơng tač rơngiao. Kơ ngă hrŏm dua bơnah, dua čô khua pơsit tong dua boh dêh čar amra kơtưn pơčrông sai, tŏ tui lăng nao rai hăng dong yua tơdruă amăng hơdôm jơnum pơƀut amăng jar kmar, sit biă ñu lĕ hơdôm mông jơnum djop bơnah anun lĕ Khul pơlir Khua pơ ala mơnuih ƀon sang rŏng lŏn tơnah (IPU), Khul pơlir Khua pơ ala mơnuih ƀon sang pơhiăp tơlơi Prang (APF).