VOV4.Jarai-Mơguah lơ 26/1, Khul wai lăng mơnuih čih tơlơi pơhing phrâo tơring čar Dak Lak ngă hrom Gơnong bruă Tơlơi pơhing hăng Pôr pơhing laih anun sang bruă djă pioh hơdrôm hră pơđok tơring čar Dak Lak pơphun jơnum, mơak Hră pơhing thun phrâo Nhâm Dần 2022. Jơnum anai, pơphun mơ̆ng lơ 26/1 truh abih lơ 4/2 pơ anăp, Hră pơhing thun phrâo Nhâm Dần tơring čar Dak Lak ba pơdă rơbêh 250 tơlơi pơhing hăng 400 pok hơdrôm hră djop mơta.

Tui hăng anŏ pơtong lăng mơ̆ng khua mua pơphun jơnum, hơdôm hră tơlơi pơhing, hơdrôm hră pơđok mơak thun phrâo thun anai, hơmâo in pơkra hiam, lu hơbô̆, kiăng pơhưč mơnuih ĕp lăng hăng thâo pơčeh hiam pok hla gah rơngiao, čih lu boh yôm phun, hăng akŏ čih bơni Ping gah mơak thun phrâo, hơdor tơngia kơ Wa Hồ, boh tơhnal dưi ngă amăng anom bruă, djop jơlan gah ƀơi tơring čar hăng mơnuih ƀôn sang. Ră ruai djop mơta tơlơi pơhing kơđi čar, bơwih ƀong huă, kơnuih ngă bruă, tơlơi khin hơtai mơ̆ng mơnuih ƀôn sang Việt Nam, boh tơhnal mơ̆ng bruă mă, pwokra ming anăp nao kơñ pơgi lŏn ia hiam klă hloh. Tơdơi kơ jơnum pơdă hră pơhing mơak thun phrâo, hơdôm mơta hră pơhing hăng hơdrôm hră pioh pơđok, amra ba nao ƀơk kơ khua mua, ling tơhan dŏ mă bruă pơ bul pơtâo, plao ia rơsĭ Trường Sa, gah Anom bruă tơhan sơlup kual 4, tơring čar Khánh Hòa.

Nay Jek: Pơblang