VOV4.Jarai-Pơwơ̆t glăi tơlơi hơdip mơda kah hăng tơđar phrâo, djop sang bruă bơwih ƀong huă sĭ mơdrô amăng tơring čar hăng gah rơngiao kơ tơring čar Dak Lak hlăk kơtưn hơduah ĕp iâu mơnuih mă bruă kiăng rŭ glăi bruă mă, pơkra ming gơnam sĭ mơdrô, anŏ gêh găl kơ bruă mă djru kơ mơnuih mă bruă apah pơwơ̆t glăi ƀơi tơring čar anai.

Djă hră lăi pơthâo hră djơ̆ anăn iâu nao mă bruă ƀơi dêh čar Japan, ayong Nguyễn Anh Tú, plơi Hiệp Thắng să Quảng Hiệp, tơring glông Čư̆ Mgar, Dak Lak brơi thâo, ñu hrăm giong gah bruă pơkra rơdêh ôtô pơ sang hră hrăm bruă tơring čar Dak Lak mơ̆ng blan 7/2021, ñu ăt hyu mă bruă pơ lu sang bruă samơ̆ ƀu hơđong ôh. Laih hmư̆ tơlơi pơhing arăng pok glăi bah amăng anih mă bruă apah, ĕp bruă mă apah pơ dêh car tač rơngiao, ñu ba nao hră rơkâo mă bruă pơ sang bruă lăi pơthâo ĕp bruă mă tơring čar Dak Lak. Tơdơi kơ 2 wơ̆t arăng tơña nao rai, dưi hơmâo sa boh kông ty pơ dêh čar Japan ruah tŭ ñu. Amăng blan 3 ñu nao pơ ƀôn prong Hồ Chí Minh hrăm tơlơi pơhiăp dêh čar Japan hăng kơsem min dơ̆ng bruă mă kiăng thâo mă bruă kơñ pơgi.

Mơnuih mă bruă nao ĕp tơlơi pơhing pơ anih lăi pơthâo bruă mă tơring čar Dak Lak

"Kâo ăt hyu ĕp mă bruă pơ gah rơngiao laih, samơ̆ kâo kiăng nao pơ dêh čar Japan  mă bruă ƀong prăk blan hơđong ƀiă tơdơi kơ hơdôm thun thơ, hơmâo djop prăk pơkom lui pioh bơwih kơ tơlơi hơdip mơda drơi jăn kâo pô. Pơ anăp anai, kâo gir run hrăm tơlơi Japan kiăng nao pơ dêh čar Japan tañ hloh či mă bruă”.

Tơdơi kơ hơduah ĕp lăng hơdôm tơlơi pơhing iâu pơmut mơnuih mă bruă, amai La Thị Thanh Lan, plơi thôn 2, să Hòa Thuận, plơi prong Ƀuôn Ma Thuôt ăt tañ mơ̆n ĕp bruă mă djơ̆ hăng ñu kiăng ƀơi kông ty tuai čuă ngui Dak Lak. Ñu brơi thâo:

"Bruă mơ̆ng kâo ngă lĕ jŭ yap prăk kăk kơ anom bruă sĭ mơdrô anun yơh kâo ĕp amăng plăng internet hơduah ĕp lăng tơlơi pơhing ĕp bruă mă kiăng sem lăng bruă mă anun djơ̆ hăng ta mơ̆n hă. Kâo ĕp lăng kông ty pơčruh ngăn tuai čuă ngui Dak Lak hơmâo bruă mă laih anun prăk blan djơ̆ rơnoh mơ̆n, bruă kâo ngă lĕ bruă jŭ yap prăk kăk anun kâo lông lăng abih pran jua".

Ƀuh ƀô̆ mơta amăng mông jơnum ĕp lăng tơlơi pơhing bruă mă ƀơi Dak Lak, ơi Lê Nguyên Phúc, khua anom bruă kông ty TNHH Hoa Xuân Vina juăt ming pơkra tơkhŏ rơjang drơi jăn ƀơi anih tuh tia pơkra ming sa ƀut Nhơn Trạch, Đồng Nai brơi thâo, kông ty hơmâo ngă hrom tơring čar Dak Lak rơbêh 7 thun hăng anai laih anun apah mơnuih mă bruă truh 5 rơbâo čô mơ̆ng tơring čar Dak Lak. Ră anai, kông ty ăt hlăk ngă hrom gong gai kơnuk kơna djop plơi pla hơduah ĕp mơnuih mă bruă apah hăng mrô mơnuih lu.

Ƀing ngă kông nhân hlăk dŏ mă bruă ƀơi kông ty pơčruh ngăn pơsơi kuăt Đông Nam Á amăng anih pơkra ming sa ƀut Hòa Phú

“Kông ty hlăk kiăng mơnuih mă bruă apah mơ̆ng 1 rơbâo truh 2 rơbâo čô, mơnuih dưi mă bruă djop mơ̆ng 18 thun pơngŏ. Prăk blan sa čô mơ̆ng 6 klăk truh 14 klăk sa blan, hơmâo djop hơdră djru mơ̆ng kông ty apah, hrom hăng anun kông ty hơmâo dơ̆ng mơ̆n hơdră djru kah hăng apah bơni 3 klăk prăk kơ mơnuih phrâo mut mă bruă rơwang hrơi tơjuh blung a, dua lĕ djru prăk apah anih dŏ amăng 2 blan kơ mơnuih nao mă bruă pơ kông ty, hơmâo rơdêh nao tŭ, ba glăi nao rai mơ̆ng anih mă bruă hăng anih dŏ…

Hră pơar čih anăn ngă hră pơar amuñ đôč, kơnong hơmâo hră rup kak mơnuih ƀôn sang, hră čih ră ruai drơi jăn sang anŏ hơmâo gru pơsit brơi mơ̆ng anih kơđŏm hră pơar dưi yơh nao pơ kông ty rơkâo mă bruă”.

Tui hăng ơi Nguyễn Văn Cường, Kơ-iăng Khua anom bruă lăi pơthâo bruă mă tơring čar Dak Lak, amăng 3 blan tal sa thun anai anom bruă ngă hrom pơphun 26 wơ̆t jơnum lăi pơthâo bruă mă ƀơi tơring glông, plơi prong; lăi pơthâo bruă mă kơ 2.223 wơ̆t mơnuih nao ĕp lăng. Ră anai, anŏ kiăng iâu mơnuih mă bruă pơ lu sang bruă sĭ mơdrô amăng lăm hăng gah rơngiao tơring čar lu biă mă.

“Mrô anom bruă čih anăn iâu pơmut ĕp bruă mă kơnang kơ anom bruă anai lu biă mă, truh mông anai hơmâo 2 rơbâo boh sang bruă čih anăn, amăng anun kiăng ĕp mơnuih mă bruă nao pơ tơring čar pơkŏn truh kơ rơbêh 22 rơbâo čô mơnuih mă bruă. Kơ anŏ kiăng ĕp mơnuih mă bruă apah amăng tơring čar truh ră anai djop sang bruă sĭ mơdrô hơmâo iâu pơmut laih 2000 čô mơnuih mă bruă”.

Ơi Nguyễn Quang Thuân, Kơ-iăng Khua Gơnong bruă wai lăng Bruă mă Tơhan rơka hăng Mơnuih mơnam tơring čar Dak Lak brơi thâo, giong jŭ yap glăi truh ră anai hơmâo năng ai 90% mrô mơnuih mă bruă apah glăi pơ plơi bĕ klin laih rơgao, ră anai pơwơ̆t glăi pơ hơdôm tơring čar pơ dơnung adih mă bruă. Mrô mơnuih mă bruă ƀu hơđong dưi hơmâo gong gai kơnuk kơna ƀơi kual plơi pla djru, pơtruh brơi tơlơi pơhing ĕp bruă mă.

Ơi Thuân lăi lĕ, hăng anih hyu mă bruă kiăng lu mơnuih mă bruă ră anai, sit mơ̆n ngă djơ̆ akŏ bruă pơsir bruă mă kơ 40 rơbâo čô mơnuih, amăng anun nao mă bruă apah pơ dêh čar tač rơngiao lĕ 1000 čô amăng thun 2022 anai.

“Ƀing gơmơi kơtưn pôr tơlơi pơhing lăi pơthâo ră anai lu sang bruă sĭ mơdrô ƀuăn amra čih tơlơi pơhing tep ƀơi pơnang să să djop să. Dua lĕ hăng mơnuih kiăng ĕp bruă mă amăng tơring čar ră anai gơmơi hơmâo kĭ pơkôl laih anun pơtruh nao rai hăng kông ty Taek wang, sa boh sang bruă pơdong amăng anih tuh tia pơkra ming sa ƀut Hòa Phú hăng kiăng ĕp mơnuih mă bruă amăng thun 2022-2023 năng ai 5 rơbâo. Hơdră tal klâo lĕ gơmơi kiăng pơtrut bruă mă tuh pơ alin pioh lu anom bruă FDI pok prong bruă mă, rai tuh pơ alin ƀơi Dak Lak pơsir bruă mă.

Ƀing gơmơi ƀuh lĕ kiăng anăp nao brơi pơsir mă bruă mă kơ mơnuih mă bruă apah amăng anun djru prăk čan pơkra ming, sĭ mơdrô kơ lu mơnuih hyu mă bruă apah ƀu hơđong, djru prăk čan brơi ĕp mă bruă pơkŏn ăt kah hăng djru pok prong pơsir bruă mă kơ pô pơkŏn.

Nam Trang pô čih-Nay Jek: Pơblang