VOV4.Jarai-Kơčăo bruă čuk pơkra glăi jơlan 1 tơring čar črăn tal 2 mơ̆ng km 49 truh pơ km 62 pơtruh nao rai tơring glông Ƀuôn Đôn hăng Ea Sup, abih tih rơnoh prăk tuh pơ alin 84 klai. Anai lĕ, kơčăo bruă pơkra jơlan pioh pơtrut tơlơi bơwih ƀong huă mơnuih mơnam kual giăm guai dêh čar, samơ̆ djop anom bruă djơ̆ anăn pơkra jơlan lĕ ngă bruă ƀu kjăp ôh tơlơi gêh găl pơhlôm rơnuk rơnua, anun hŭi biă mă hơmâo tơlơi truh rơdêh rô nao rai; anŏ kjăp jơlan čuk pơkra ƀu lăp ôh.

Amai Hoàng Thị Tiến, sang ñu dŏ giăm jơlan 1 tơring čar, să Čư̆ Mlan, tơring glông Ea Sup lăi, dơ̆ng mơ̆ng anom bruă anai tuh pơ alin ming pơkra jơlan găn rai pơ anăp sang, pơ anai hơmâo na nao tơlơi truh rơdêh bơrơbuh. Ƀing mơnuih mă bruă pơkra jơlan, plang ia rô gơñu ƀu hlă gai pơthâo brơi ôh anŏ hŭi rơhyưt. Yua kơ anun, kual anai hơmâo na nao tơlơi truh rơdêh pơjrom. Phrâo anai hloh hơmâo sa čô đah rơkơi ƀiă či djai. Amai Hoàng Thị Tiến ră ruai:

‘’M ơ̆ng čran sang gơmơi nao pơ tơring kual adih anun hơmâo 4-5 wơ̆t laih rơdêh bơrơbuh, kơnong ƀơi anăp sang gơmơi anai 3 wơ̆t. Kiăng kơ gong gai kơnuk kơna pơtă pơtăn ƀing ngă bruă pơkra jơlan anai ngă hmar ƀiă, kơđiăng hloh, lui jơlan plăng ia djơh hăng anun hŭi rơhyưt biă mă’’.

­Kông ty TNHH Hoài Ân dŏ pơkra ring bruă samơ̆ ring bruă ngă ƀu djơ̆ anŏ pơkă rơnuk rơnua jơlan glông

Bơ ơi Trương Kim Hòan, sang anŏ ăt dŏ giăm jơlan 1 tơring čar mơ̆n, găn nao pơ tơring kual Ea Sup brơi thâo, ƀu kơnong ngă bruă pơkra jơlan rơnuk rơnua đôč ôh, boh tŭ yua mơ̆ng lu čran bruă ăt hơmâo tơlơi mơ̆n. Lăng nao pơ pơnăng gơñu gôm plăng ia rô đôč, ƀơi dua bơnah ngă kơ mơnuih hăngƀing đĭ rơdêh rô nao rai juăt tơr hnơl gôm anun pơčah abih. Ĕp lăng ƀuh rơđah ia ƀlit tuh pơkra jơlan kơsu anai ƀu đôm hăng pơsơi ôh, čuah ƀêtông brui brai hlai soh sel. Ơi Trương Kim Hòan lăi:

‘’Hơdôm pok hơnăl tơr anai yua gah ƀing pơkra jơlan dưm kiăng pơgang plang ia rô ƀơi anăp sang gơmơi, ta đĭ rơdêh thut đĭ nao ñu pơčah abih. Tơl rơpih hăng rơčăm đơi anun sit găn nao đĭ juă pơčah brai, lăng tong ten hnăl anun ngă hăng čuah ƀêtông pơsơi gơ̆ ƀu đôm nao rai ôh. Anun yơh anŏ kjăp mơ̆ng hơdôm pok hnăl simăng anun amuñ đơi’’.

Anŏ kjăp ƀêtông hăng pơsơi ƀơi hnăl simăng brui brai hăng amuñ pơčah

Tui hăng ơi Nguyễn Xuân Hà, Khua jơnum min să Čư̆ Mlan, kơčăo bruă pok prong jơlan 1 tơring čar găn nao pơ să Čư̆ Mlan kơnong rơbêh 1 km đôč, dưi pok pơhai pơkra mơ̆ng akŏ thun 2021. Črăn anai yua kông ty sa ding kơna Hòai Ân, sang bruă pơ Ƀuôn Thuôt pô pơkra. Truh ră anai, črăn jơlan tuh kơsu giong yơh, hơdôm bruă pơkŏn kah hăng amăng plang ia rô dua bơnah jơlan, gong pơčrang dua bơnah hăng hnăl pơčrâo anăp nao ăt hlăk dŏ pơkra.

Ơi Nguyễn Xuân Hà lăi pơtong, khua mua jơnum min mơnuih ƀôn sang să hơmâo lăi pơthâo lu laih hơdôm tơlơi mơnuih ƀôn sang lăi brơi, yua ƀing pơkra jơlan ngă bruă aka ƀu djơ̆ anŏ kiăng, rơngiă tơlơi rơnuk rơnua hơđong lơ̆m rô nao rai ƀơi jơlan glông. Khua mua sang să čih pioh tơlơi pơgôp hiăp mơ̆ng mơnuih ƀôn sang laih anun mơĭt nao pơ tơring glông laih anun mơĭt glăi kơ khua sang bruă pơkra jơlan brơi gơñu đing nao ƀiă hơdră pơkra ming brơi kjăp.

‘’Laih ĕp lăng brơi ƀuh ring bruă kông ty Hòai Ân pơkra amăng pơhluh ia ƀudah gong pơčrang dua bơnah jơlan, hlă hnăl pơčrâo jơlan ngă ƀu djơ̆ ôh anun rô nao rai ƀu hơđong lơi, amuñ ba truh tơlơi bơrơbuh rơdêh thut rô nao rai. Sang să rơkâo đĭ hăng anom bruă wai lăng Bowih ƀong hăng jơlan glông tơring glông, khul wai lăng kơčăo bruă mơ̆ng tơring čar pởtun hiăp kơ sang bruă čuk pơkra jơlan khom ngă djop anŏ gêh găl pơkra jơlan pơhlôm pơgang tơlơi rơnuk rơnua kơ mơnuih ƀôn sang rô nao rai’’.

Lu hnăl simăng bêtông phrâo pơkra mơnuih juă đĭ, rơdêh

găn rơgao nao rai pơčah tơplŭk

Kơčăo bruă glăi jơlan anai, pơđĭ glăi jơlan 1 tơring čar tal 2 mơ̆ng km 49 truh pơ km 62 pơplah Ea Sup hăng Ƀuôn Đôn rơnoh prăk tuh pơ alin 84 klai prăk. Ring bruă anai yua ngă hrom mơ̆ng Kông ty sa ding kơna Hòai Ân, Kông ty pơkra jơlan Việt Đức, kông ty man pơdong hăng pơkra jơlan glông Đức Nguyên hăng kông ty man pơdong pơčruh ngăn pơđĭ kyar Đại Việt pô pơkra, khua mua pơ ala tuh pơ alin lĕ khul wai lăng kơčăo bruă man pơdong ming pơkra ring bruă jơlan glông hăng ngă hmua pơđĭ kyar plơi pla Dak Lak. Truh ră anai, ƀing   ngă bruă, sang bruă tuh pơ alin hơmâo pơkra 80% črăn bruă.

Anai lĕ, đingnao hlâo hloh kiăng pơtrut pơđĭ kyar bơ wih ƀong huă mơnuih mơnam kual guai dêh čar mơ̆ng tơring čar hăng rơnoh prăk tuh pơ alin hơdôm hơpluh klai prăk. Pô tuh pơ alin amra pơsir khut khăt tơlơi soh glăi amăng bruă mă, ngă bruă tŭ kơ hơmâo anai, ăt kah hăng khom pel ĕp lăng tong ten pơtrut bruă čuk pơkra jơlan pơgang tơlơi rơnuk rơnua kơ mơnuih ƀôn sangn rô nao rai huăi hơmâo tơlơi truh rơdêh pơjrom ƀudah rơbuh rơdêh thut jrom djơ̆ drưp drap ƀơi akiăng jơlan mơ̆ng bruă ngă tŭ kơ hơmâo anai.

Tuấn Long pô čih-Nay Jek: Pơblang