Kiăng mơnuih ƀôn sang yua apui lơtrik pơkrem, amăng hrơi blan rơgao kông ti apui lơtrik Dak Lak tŏ tui pok pơhai ha amăng plĕ hơdôm hơdră bruă pôr pơhing, lăi pơthâo. Gơnong bruă hơmâo kơtưn pôr pơhing kơ bruă yua apui lơtrik pơkrem hluai tui hơdôm anom bruă pôr pơhing, amăng websit, pano, hluai tui hơdôm hră pơ-ar git gai mơng djop gưl gong gai, ba hyu hră pơ-ar tơl tơngan mơnuih ƀôn sang, pơtrut pơtô pơblang ƀơi sang hră…Yôm hloh lĕ tal pơphun “Sang anŏ yua apui lơtrik pơkrem thun 2024” glăk pok pơhai hăng hiam lăng amra jao gơnam pơpŭ brơi 300 boh sang anŏ ba gru.

Tal pơplông “Čơđai sang hră yua apui lơtrik rơnuk rơnua-pơkrem-tŭ yua” pơhưč rơbêh 10 rơbâo tơlơi čih ba nao pơplông. Hăng hơdôm hơdră bruă ngă ha amăng plĕ, 9 blan rơgao, đơ đam tơring čar Dak Lak hơmâo pơkrem giăm 60 klăk kWh, amăng anun giăm ha mơkrah lĕ pơkrem mơng apui yua amăng sang anŏ.