Anai lĕ jơnum tơđar mơkrah thun pioh sem lăng, pơtong glăi bruă ngă tui hră pơtrun mơ̆ng khua pơ ala mơnuih ƀôn sang tơring čar kơ bruă mă pơđĭ kyar bơwih ƀong huă mơnuih mơnam 6 blan akŏ thun hăng ngă tui hơdră pơsir 6 blan rơnuč thun. Hră lăi pơthâo amăng mông jơnum, amăng 6 blan akŏ thun anai, tơlơi bơwih ƀong huă mơnuih mơnam ƀơi Dak Lak hơđong ƀiă mơ̆n. Rơnoh pơhrui glăi pơkă abih bang truh 24.500 klai prăk, đĭ tui 4% pơkă hăng tal anai thun 2022. Rơnoh prăk sĭ mơdrô hăng dêh čar tač rơngiao pơhrui glăi 810 klăk USD, đĭ tui 2% pơkă hăng thun hlâo.

Khă tui anun, rơnoh prăk duh jia hăng pơplai prăk kơnuk kơna hrŏ hĭ rơbêh 16% pơkă hăng thun hlâo, hơdôm bruă mă pơhưč tuh pơ alin sĭ mơdrô, pơsir bruă mă, pơhrŏ ƀun rin hơđong kjăp bưp lu tơlơi tơnap tap, lu hơdră pơtrun mơ̆ng dêh čar pok pơhai kaih....Jơnum lok anai, hrŏm hăng pơčrong sai lăi pơthâo akŏ bruă bơwih ƀong huă 6 blan rơnuč thun, khua mua pơ ala mơnuih ƀôn sang tơring čar Dak Lak amra pơčrong sai, pơgôp hiăp lu hơdră bruă, kơčăo bruă yôm amăng tơring čar; pơblang tong ten tơlơi tơnap tap, gun gan, anŏ ngă kơđông hĭ khom pơsir, ngă pơrơđah phun tơdŭ ñu hơmâo pioh ngă tui bruă jao amăng 6 blan rơnuč thun tŭ yua hloh.