VOV4.Jarai - Mơmŏt lơ 10/7, ƀơi Sang ngui adôhsuang tơring čar Dak Lak, Khul mơnuih čơmah tơring čar Dak Lak gum hrŏm hăng gơnong bruă gru grua-bơrơguăt drơi jăn hăng tuai čuă ngui Dak Lak pơphun mlăm adôh suang Tơlơi yôm mơng hơtai boh. Mơng anun amra pơgôp amăng keh prăk rơbêh 660 klăk prăk laih anun amra mă yua kiăng kơ djru brơi mơnuih mơnam, amăng anun hơmâo pơtô brơi čơđai luai ia hăng djă pioh gru grua mơñam abăn ao ƀơi ƀon lan.

Khul pơphun jao hră pơpŭ bơni brơi rĭm čô mơnuih, khul grup djru amăng jơlan hơdră anai.

Amăng jơlan hơdră ăt jao 2 boh tơkhŏ yôm pơkra tui gru grua mơñam mrai yua La Quốc Bảo pô pơkra kiăng kơ ƀơk brơi hơdôm bruă bơdjơ̆ nao djru mơnuih mơnam ƀơi Dak Lak. 2 boh tơkhŏ anai amra hơmâo sĭ kiăng kơ kơ pơgôp amăng bruă djru mơnuih. Khul pơphun hơmâo tŭ mă rơbêh 660 klăk prăk mơng lu mơnuih, anom bruă, khul grup pơgôp amăng jơlan hơdră anai. Abih tih prăk amra djru amăng bruă pơtô brơi čơđai luai ia hăng man pơdong sang glông Êđê ngă anih mơñam mrai hăng lăi pơthâo bruă mơñam mrai mơng đah kơmơi ƀơi să Dray Bhăng, tơring glông Čư̆ Kuiñ.

Siu Đoan: Pơblang