Anai jing hơdôm ring bruă hơmâo prăk tuh pơ alin hơdôm pluh rơbâo klai, amra pơplih phrâo bruă măi mok hăng logistics kơ kual Dap Kơdư hăng Dơnung Tong Krah. Amăng anun bruă tuh pơ alin man pơdong hăng sĭ mơdrô anih anom Kual sang măi Hòa Tâm - Rơwang tal 1 hơmâo man pơdong ƀơi đơ đam lŏn prong năng ai 492ha; prăk man pơkra năng ai 4.200 klai prăk. Kơčăo bruă djru pơjing rai anih anom dưm kơnar kơ bruă akŏ pơdong Kual pơlir hơbit pơsơi pơsă Hòa Phát dưi pơkra 6 klăk tơn/thun, prăk tuh pơ alin năng ai 84.000 klai.

Bruă man pơkra tơdrun kom păn Bãi Gốc hơmâo năng ai 16.300 klai. Dua kơčăo bruă anai yua Grup bơwih ƀong Hòa Phát tuh pơ alin. Laih dong, Dak Lăk ăt pơphun ngă Kơčăo bruă sang măi pơkra boh thâo yôm ƀơi phường Hòa Hiệp yua Grup N&G tuh pơ alin, prong rơbêh 250ha, prăk ngă bruă giăm 2.400 klai. Lơ̆m hơdôm kơčăo bruă anai dưi mă yua amra bang hyu, djru đĭ kyar hơdôm bruă sĭ mơdrô, bơwih bơwang mơ̆ng tơring čar Dak Lăk, pơsir bruă mă brơi hơdôm pluh rơbâo čô mơnuih amăng tơring čar./.