VOV4.Jarai-Sa thun hrăm phara biă mă yua lu hrơi blan hrăm online, ngă kơ lu čơđai sang hră anih 12 ƀơi Dak Lak bơngơ̆t kơ tal pơplông abih anih 12 thun 2022. Kiăng kơ ƀing čơđai hơđong pran jua hrăm hră, lu sang hră gưl klâo hơmâo ngă hơđong pơtô hrăm glăi tơlơi hrăm pioh pơplông abih anih 12. Ƀơi sang hră gưl klâo Lê Qúy Đôn, plơi prong Ƀuôn Ma Thuôt, tơring čar Dak Lak, hơmâo rơbêh 530 čô čơđai sang hră anih 12, hrăm online đôč abih ha thun anai.

Kiăng djru kơ čơđai sang hră abih gưl, khua mua sang hră sem glăi tơlơi hrăm hră kơ rĭm čô čơđai kiăng thâo kah pơpha hơdră pơtô, pơpha anih hrăm laih anun hơmâo akŏ bruă pơtô brơi phara. Tal pơplông abih anih 12 thun 2022 him lăng pơphun amăng hơdôm hrơi mơ̆ng lơ 7-11/7/2022. Tơdah klin kheng ăt kơtang amra pơhrơ̆I glăi hrơi pơplông pơkŏn, ngă lu tal kah hăng thun 2021. Truh ră anai, lu sang hră gưl klâo ƀơi Dak Lak pơphun lu hơdră pơtô hrăm glăi kơ čơđai sang hră pioh kơ čơđai sang hră hơđong pran jua yak nao tal pơplông abih anih 12 klă hloh.

Nay Jek: Pơblang