VOV4.Jarai - Tlam lơ 29/7, Jơnum min pơ ala mơnuih ƀon sang tơring čar Dak Lăk pơphun Jơnum lok 4 sem lăng, tŭ ư hrŏm pơplih glăi Tơlơi pơtrun tuh pơ plai pơkra ming hiam hơdôm boh dơnao kŏng ia. Tơlơi pơtrun mrô 11/2022 mơng Jơnum min pơ ala mơnuih ƀon sang tơring čar Dak Lăk (hơmâo pơsit mơng blan 6/2022), hơmâo 8 kơčăo bruă, hăng rơnoh tuh pơ plai 134 klai prăk, prăk mơng kơnuk kơna ta brơi. Kơplah wah blan 7, Ding jum dăp hlâo akŏ bruă hăng tuh pơ plai hơmâo hră lăi bruă pơsit brơi 8 kơčăo bruă ƀơi Tơlơi pơtrun mrô 11 mơng tơring čar Dak Lăk aka ƀu djơ̆ lăp ôh laih anun rơnoh prăk pioh ngă bruă hơmâo amăng jơlan hơdră rŭ glăi pơđĭ kyar bơwih ƀong huă - mơnuih mơnam, kiăng pơplih glăi djơ̆. Yua hnun, ƀơi mông jơnum anai, Jơnum min pơ ala mơnuih ƀon sang tơring čar Dak Lăk pơplih glăi rơnoh tuh pơ plai 8 kơčăo bruă lĕ 134 klai, amăng anun hơmâo 123 klai mă mơng prăk kơnuk kơna laih anun rơbêh 11 klai mă mơng mrô prăk amăng tơring čar.

        Siu H’Mai: Pơblang