VOV4.Jarai - Hrơi pơplông abih anih 12 thun 2022 ƀiă truh laih, klin Covid-19 ăt dŏ kơtang mơn, hơdôm boh sang hră gưl 3 ƀơi tơring čar Dak lăk glăk pơtô hrăm pơplih mă lăp djơ̆ đah mơng dưi pơtô hrăm giong boh hră amăng thun hrăm. Biă ñu lĕ prăp lui tơlơi hrăm kơ ƀing čơđai abih gưl, prăp lui mông pơplông abih anih 12 hăng ruah hrăm gưl prong pơ anăp anai.

Sa thun hrăm hăng lu wơ̆t pơplih tơlơi hrăm hră, hmit hrăm pơ sang hră, hmit hrăm mơng ataih online jing bơbeč djơ̆ tơlơi hrăm hră ăt kah hăng tơlơi pơmin mơng ƀing čơđai mơn, biă ñu čơđai anih 12. Kiăng ƀing čơđai hơđong pran, sang hră gưl 3 Nguyễn Bỉnh Khiêm, tơring glông Krông Pač, tơring čar Dak Lăk hơmâo pơphun ngă lu hơdră pơtô hrăm djơ̆ lăp hăng tơlơi klin kheng mơn. Amăng anun, sang hră kiăng ƀing nai pơtô gơgrong bruă hloh. Nai Nguyễn Thị Thúy, nai pơtô tơlơi Hóa học, sang hră gưl 3 Nguyễn Bỉnh Khiêm brơi thâo:

“Gir hơduah ĕp tơlơi pơhing amăng plang internet, hrăm nao rai ƀing gŏp mă bruă mơng hơdôm boh sang hră đah mơng dưi ngă giong mông pơtô, pơhlôm brơi čơđai hrăm djŏp tơlơi kiăng thâo. Tơdơi kơ anun, tui hluai kơ rim čô nai mơn, pơtrut brơi ƀing čơđai kiăng hor hrăm hră hloh hăng bruă brơi puăng, ƀudah amăng mông hrăm brơi ƀing čơđai ngui, pơđao nao rai đah mơng huăi glêh đơi, čơđai ñu huăi alah đơi lơi, amuaih hrăm hră hloh, tui anun amăng mông pơplông pơ anăp anai gơñu thâo pơkra ƀai ƀiă”.

Mông hrăm pơ sang hră gưl 3 Nguyễn Bỉnh Khiêm, tơring glông Krông Pač, tơring čar Dak Lăk.

Hăng ƀing čơđai sang hră anih 12 sang hră gưl 3 Lê Hữu Trác, tơring glông Čư̆ M’gar, mah hrơi čơđai pơdơi sang hră pơgang Covid-19 sui biă, samơ̆ tơlơi gơgrong bruă, pơplih phrâo tơlơi pơtô mơng nai pơtô djru ƀing čơđai hơđong hloh. Adơi Hoàng Thị Minh Châu, čơđai sang hră anih 12A1, brơi thâo:

“Ƀing nai pơtô hăng sang hră ngă gêh gal brơi ƀing gơmơi hrăm, kah hăng sang hră tơña bla na nao kơ bruă hrăm hăng pơgang klin dong. Ƀing nai pơtô tơlơi hrăm hăng nai wai lăng sang hră pioh lu mông lăi glăi tơlơi ƀing čơđai aka ƀu thâo hluh, aka ƀu rơđah, anun jing gơmơi ƀu hơmâo tơlơi tơnap hơget ôh”.

Tar ƀar tơring čar Dak Lăk hơmâo 59 boh sang hră gưl 3, amăng anun hơmâo 48 boh sang hră anih 12 brơi čơđai nao hrăm pơ sang hră. Hơdôm boh sang hră dŏ glăi ăt brơi hrăm tui mơng ataih, lu biă ñu l čơđai sang hră ƀơi plơi prong Buôn Ma Thuột hăng tơring glông Krông Ƀuk đôč. Ơi Phạm Đăng Khoa, Khua gơnong bruă pơtô hăng pơjuăt tơring čar Dak Lăk brơi thâo, kiăo tui klin kheng ƀơi tơring mơn, hơdôm boh sang hră brơi pơtô hrăm lăp djơ̆, pơhlôm djŏp mông hrăm, tơlơi hrăm, laih dong pơhlôm tơlơi suaih pral kơ ƀing khua, nai pơtô, mơnuih mă bruă, čơđai sang hră. Hơjăn ƀing čơđai anih 12, hơdôm boh sang hră kiăng pơtŏng glăi tơlơi hrăm hră mơng ƀing čơđai đah mơng thâo pơtô thim dong, pơƀut pơtô glăi hơdôm tơlơi hrăm pioh pơplông. Ơi Phạm Đăng Khoa lăi:

“Gơmơi pơtô ba laih hơdôm boh sang hră gưl 3 čih pơkra hơdôm tơlơi juăt ba pơplông mơng Gơnong bruă pơtô hăng pơjuăt, kiăng pơplông lăng, pơtŏng glăi anŏ klă mơng sang hră. Laih dong, hluai tui boh than anai hơmâo hơdră pơtô kiăng čơđai hơdor glăi tơlơi hrăm, pơhlôm kiăng ƀing čơđai thâo tơlơi hrăm pioh pơplông pơ anăp anai”.

Hương Lý: Čih - Siu H’Mai: Pơblang