Tui hăng Anom bruă djuai ania tơring čar Dak Lak, đơ đam tơring čar hơmâo giăm 1000 čô mơnuih arăng đăo kơnang amăng plơi pla mơnuih djuai ƀiă. Anai lĕ, ƀing mơnuih dŏ hơdip mơda hrom amăng plơi pla, thâo tơlơi phiăn, tơlơi juăt hăng tơlơi dŏ dong ƀong huă, gru grua hiam djuai ania, laih anun gơñu mơnuih ba gru hlâo amăng bruă mă bơwih ƀong huă hơdip tơpă, hiam klă, djă pioh gru grua đưm amăng plơi pla djơ̆ lăp. Amăng hơdôm thun rơgao, mơnuih arăng đăo kơnang jing ƀing ngă bruă phun, pô pơtruh brơi khua mua kơnuk kơna hăng mơnuih ƀôn sang djop djuai ania, pơgôp prong biă mă amăng bruă jak iâu mơnuih ƀôn sang djuai ƀiă gum hrom akŏ pơdong ping gah, kơnuk kơna, bruă kơđi čar amăng tơring čar.

Ƀơi mông jơnum, ƀing khua mua nao jơnum hơmâo pơčrông sai, kah pơpha nao rai tơlơi thâo thăi pơđĭ tui tơlơi gơgrong ba mơ̆ng mơnuih arăng đăo kơnang amăng djop bruă mă pơtrut pơđĭ kyar bơwih ƀong huă, pơgang pioh hăng pơđĭ tui gru grua hiam djuai ania, djru hrom pơgang rơnuk rơnua kơđi čar hăng tơlơi hơđong kơ ană plơi pla. Ƀrô djơ̆ tal anai, tơring čar Dak Lak hơmâo pơpŭ bơni kơ 100 čô mơnuih arăng đăo kơnang ba gru hlâo amăng thun 2022.