Ƀơi anih man pơkra tơkuh nao rai hơdôm boh să Ea Wer hăng Ea Nuôl (tơring čar Dak Lak), mơnuih mă bruă glăk pơkra dua bơnah, pơdong gŏng, pik glông…kiăng kơ pơgiong hơdôm bruă rơnuč, tañ ba jơlan mă yua. Ơi Trần Anh Dương, Khua kôngh ti TNHH čuk pơkra jơlan Dương Hiền (să Ea Nuôl, tơring čar Dak Lak) brơi thâo, ară jơlan glông 3,9 km, abih tih prăk tuh pơ alin 18,5 klai prăk, yua pơlir tlâo anom bruă man pơkra, bruă man pơkra mơng blan 2/2024 truh blan 9/2025. Ră anai bruă man pơkra jao anom bơwih ƀong sĭ mơdrô hơmâo pơgiong 95% bruă mă. Samơ̆, prăk jao brơi anom bơwih ƀong sĭ mơdrô dŏ aset, lơm anun hrơi mông pơkă kiăng pơhlôm djơ̆. Ơi Dương brơi thâo:

“Ƀơi ară jơlan pơlir să hơmâo čuk pơkra mơng blan 2 thun 2024 truh ră anai, samơ̆ phrâo jao prăk 2,5 klai amăng abih tih 8,5 klai prăk. Ră anai jơlan ƀiă giong laih, dŏ kơnong hơdôm anih pơdong gŏng, man pơkra dua bơnah jơlan…Jơlan pơkra ƀiă giong laih samơ̆ prăk jao trun aka ƀu ƀuh, ƀing gơmơi khŏm hyu čan kiăng kơ man pơkra, ha blan dong abih hră pơkôl pơkă mơ̆ ƀu jao prăk ăt ngă tơnap tap biă”.

Amăng akŏ bruă tuh pơ alin man pơdong thun 2025, tơring glông Buôn Đôn (hơđăp) hơmâo tơring čar Dak Lak kah pơpha 106 klai prăk kiăng tla hnưh hơdôm ring bruă đôm glăi mơng hơdôm thun hlâo anun hăng man pơkra phrâo hơdôm ară jơlan, man pơdong hơdôm anih anom, sang hră, sang ia jrao amăng thun anai. Ơi Cao Ngọc Duy-Khua khul wai lăng akŏ bruă tơring glông Buôn Đôn (hơđăp) brơi thâo, truh ră anai, anom bruă phrâo tŭ mă 40 klai prăk, dưm dưm 39% tui mrô pơkă. Ơi Duy brơi thâo dong, bruă jao prăk kaih mơng akŏ thun hăng mơng lơ 1/7 truh ră anai ăt dŏ gun mơn.

“Lơm pơmut hrŏm mơng lơ 1/7, prăk kiăng jao brơ gơnong bruă prăk kak wai lăng. Samơ̆, truh ră anai aka ƀu kah pơpha brơi anom bruă tuh pơ alin, yua anun bruă jao trun prăk pơdơi jang jai mơng hrơi pơmut hrom truh ră anai, hơdôm anom bruă man pơkra lêng aka ƀu duh prăk. Mah bruă jao prăk hơmâo prap lui laih, samơ̆ aka ƀu hơmâo tơlơi pơsit jao brơi anom bruă tuh pơ alin, anun ƀing gơmơi ăt aka ƀu dưi jao prăk. Laih dong, yua pơmut hrŏm dua gưl, mơnuih apăn bruă dua gưl mơng Khul aka ƀu tŭ yap, aka ƀu hơmâo kru glĭt, ba truh kơ bruă jao prăk truh ră anai dŏ aset pơhmu hăng hơdôm thun hlâo anun”.

Ơi Trương Công Thái, Kơ-iăng Khua Jơnum min mơnuih ƀôn sang tơring čar Dak Lak lăi pơthâo, tơdơi kơ tơring čar pơmut hrŏm hăng lui hĭ gưl tơring glông mơng lơ 1/7, đơ đam khul wai lăng akŏ bruă gưl tơring glông kiăng pơmut hrŏm 3 khul wai lăng akŏ bruă gưl tơring čar hăng ră anai glăk dưm dăp hơdôm khul amăng kual. Bruă mă anai ba truh kơ bruă pơplih kru glĭt, pơplih mơnuih mă bruă, laih dong kiăng pơkra glăi anăn mă yua, bơdjơ̆ nao kơ bruă jao prăk tuh pơ alin man pơdong hơdôm akŏ bruă man pơdong. Ơi Trương Công Thái brơi thâo, ƀơi anăp kơ tơlơi anai, Jơnum min mơnuih ƀôn sang tơring čar hơmâo git gai khut khăt bruă dưm dăp anih anom, pơtrut tañ kơ bruă pơplih kru glĭt hăng pok pơhai kah gưl tong ten amăng jao prăk tuh pơ alin man pơdong:

“Truh ră anai hơdôm anom bruă mơng tơring glông hơđăp hơmâo pơmut hrŏm gưl tơring čar, hăng pơgiong bruă pơplih kru glĭt, pơplih anăn yua hăng dưm dăp mơnuih mă bruă. Yua anun, rơnuč blan 9 anai amra pơtrut tañ bruă pơhrua glăi prăk aka ƀu jao mơ̆ phrâo anai kaih jao. Laih dong ƀing gơmơi ăt rơkâo hơdôm anom bruă tuh pơ alin, anom bruă man pơdong ječ ameč ngă hră pơ-ar duh prăk man pơkra hlâo anun, kiăng mă glăi prăk yua jang jai, pơhlôm bruă jao prăk hăng djru brơi anom bruă man pơkra hơmâo prăk tŏ tui ngă bruă”.

Rơngiao kơ bruă pơsir hĭ kơƀah kru glĭt ba truh kơ bruă kaih jao prăk, Dak Lak ăt kơtưn bruă pơtop hrăm-jao bruă brơi hơdôm anom bruă, ƀon lan. Tui ơi Huỳnh Gia Hoàng, kơ-iăng Khua gơnong bruă prăk kak tơring čar Dak Lak, lơm tong ten bruă mă, tơlơi gơgrong mơng rĭm anih anom, dua mơta bruă gun prong amăng jao prăk hăng pơhrui glăi lŏn mơnai amăng tơring čar lêng hơmâo pơsir hĭ klă:

“Kiăng lăng nao tong ten, ƀing apăn bruă ƀơi hơdôm boh ƀon lan sư̆ rơbư̆. Yua anun hơdôm gơnong bruă, sang bruă hơmâo pok anih pơtop hrăm kiăng kah pơpha tong ten bruă jao kơplah wah djop bơnah hăng tơlơi glăm ba mơng hlơi amăng să ƀudah tơring čar kiăng ngă tui. Mơng anun, lơm pơtop hrăm, ƀing apăn bruă thâo rơđah tơlơi gơgrong, tơlơi glăm ba amăng bruă jao prăk tuh pơ alin man pơdong hăng pơhrui glăi lŏn mơnai”.

Lơm hơdôm tơlơi gun amăng pơphun, mơnuih mă bruă hăng ngă hră pơ-ar hăng tơlơi glăm ba hơmâo hơkrŭ kjăp, prăk tuh pơ alin amra pok phư, pơtrut brơi hơdôm ring bruă, akŏ bruă pơgiong djơ̆ hrơi mông pơkă. Anai ăt lĕ tơlơi yak nao phun kiăng Dak Lak pơtrut pơđĭ kyar anih anom, pơgôp pơđĭ kyar bơwih ƀong huă-mơnuih mơnam hơđong kjăp amăng hrơi blan ngă bruă tơdơi kơ pơmut hrŏm./.