Giong hyu sem lăng, jŭ yap glăi, tơring čar ba anăn 396 ring bruă, kơčăo bruă pioh krăp lăng, brơi pơsir. Truh ră anai, djop sang bruă hơmâo tơlơi dưi pơsir laih 193 amăng mrô 200 mơta kơčăo bruă, laih dơ̆ng brơi pơdơi mơtam 8 kơčăo bruă ƀu tŭ yua, mă glăi 91 hektar lơ̆n jao hlâo kơ anun.

Khua git gai ping gah tơring čar Dak Lak, ơi Lương Nguyễn Minh Triết brơi jŭ glăi tong ten hloh, kah pơpha anăn kơčăo bruă tui rơnoh ngă kaih kơđông hĭ anun, pơtong rơđah phun ñu yua sang bruă pơpă, anom bruă hlơi hăng khua pô glăm ba, ƀu lui kơ hră pơar lăi pơthâo bĕ hĭ pơdar, jăm ƀuah nao rai pô glăm ba ôh. Sem lăng pô hlơi či ngă soh lĕ, kah pơpha tong ten pơsir tơlơi tơnap tap brơi djơ̆ găl, pơsir kơđi tơlơi soh djơ̆ hăng tơlơi phiăn pơkă. Khua mua tơring čar brơi kah pơpha tañ, hlâo kơ kơnôl 30/9 khom ngă giong; laih dơ̆ng pơtrut ngă bruă tuh pơ alin, brơi anom bruă ngă djơ̆ tơhnal pơkă.