Amăng mông ngă lơphet, Khul mơnuih bơwih ƀong sĭ mơdrô Dak Lak hơmâo lăng glăi hơdôm bruă tơkuh nao rai, pơsur sĭ mơdrô, djru pơplih mrô, pơyơr drah hăng djru brơi mơnuih mơnam, jao hră pơpŭ brơi hơdôm grup, ƀing mơnuih hơmâo ngă truh kih amăng bruă pơjing hăng pơđĭ kyar tơring čar Dak Lak. Ơi Phạm Đông Thanh, Khua khul mơnuih bơwih ƀong sĭ mơdrô tơring čar Dak Lak brơi thâo, Khul ƀuăn tŏ tui ngă gong jơlan, djru pơsir hĭ tơnap tap, pơtrut pơlir hơbit hăng hrưn đĭ pran bơkơtưn brơi anom bơwih ƀong sĭ mơdrô. “Ƀing gơmơi pơsit rơnoh yôm mơng khul hăng bruă ƀing ding kơna tŭ mă hơget, anom bơwih ƀong pơlir hăng hlơi, tơlơi tơnap tap hơpă kiăng pơsir hĭ hăng tơlơi dưi hơpă amra pok rai. Kiăng pơđĭ kyar tañ, hơđong kjăp ƀing ta kiăng kơtưn pơlir hơbit, hrưn đĭ amăng wai lăng, pơplih yua boh thâo phrâo hăng pơđĭ kyar bruă pơkra gơnam klă hloh, pơjing anăn apăn gơnam tam amăng ƀon lan.”

Tui akŏ bruă pơđĭ kyar bơwih ƀong mơnuih ƀôn sang ngă pô, truh thun 2030, Dak Lak gir run hơmâo rơbêh 29.000 anom bơwih ƀong sĭ mơdrô ngă bruă, kual bơwih ƀong mơnuih ƀôn sang ngă pô pơgôp rơbêh ha mơkrah GRDP. Anăp nao truh thun 2045, Dak Lak ba tơbiă hơnong pơkă hơmâo rơbêh 53.000 anom bơwih ƀong sĭ mơdrô, pơgôp giăm 2/3 GRDP.

Kiăng hơnong pơkă pơđĭ kyar bơwih ƀong dua mrô, Dak Lak kiăng mă yua klă hơdôm ngăn rơnoh mơnuih mơnam, amăng anun hơmâo tơlơi gơgrong phun mơng kual bơwih ƀong sĭ mơdrô. Ơi Y Nhuần Byă, Kơ-iăng Khua Jơnum min mơnuih ƀon sang tơring čar Dak Lak pơsit tong, tơring čar amra tŏ tui gum hrŏm djru brơi anom bơwih ƀong sĭ mơdrô pơđĭ kyar. “Tơring čar pơsit anom bơwih ƀong sĭ mơdrô lĕ bơnah ngă hrŏm phun amăng pơđĭ kyar. Tơlơi pơđĭ kyar mơng anom bơwih ƀong sĭ mơdrô ăt lĕ tơlơi pơkă brơi boh tŭ yua amăng wai lăng hăng pơplih bruă tuh pơ alin bơwih ƀong sĭ mơdrô. Tơring čar amra tŏ tui pơtrut kơtang amăng pơplih ngă hră pơ-ar, hrưn đĭ ngă tong ten amăng pok pơhai ngă hră pơ-ar; đing nao pơsir hĭ tơnap tap, gun găn amăng tuh pơ alin, lŏn mơnai, dưm dăp man pơdong hăng ngă hră pơ-ar bơdjơ̆ nao truh bơwih ƀong sĭ mơdrô; kơtưn pơlăi nao rai, đing tơngia hmư̆ hăng pơsir hĭ hmao tlôn hơdôm tơlơi rơkâo sit nik mơng anom bơwih ƀong sĭ mơdrô.”./.