Hrơi mă Miđai 55 thun mut Ping gah, Ơi Nguyễn Hữu Quyền, ƀơi ƀut plơi 5 Tân Thành, phường Buôn Ma Thuột, ol kơdol lơ̆m hơdor glăi thun blan ngă đưm adih. Thun 1970, ñu nao ngă tơhan, hơmâo pơmut amăng Ping gah amăng rưng hơmâo pơtơi glai soh ƀơi lŏn čar Kur. Tơdơi kơ hơdôm hrơi mơ̆ng anun, pô gŏp kiăng pơmut ñu amăng Ping gah djai hĭ. Tơlơi ƀuăn mơ̆ng mơnuih ping gah lơ̆m anun mut hrŏm anih blah ngă, hrŏm hăng ƀing gŏp laih anun hrŏm hăng bruă blah ngă.

Tơdơi kơ rơnuk blah ngă, ơi Quyền ăt ngă bruă kơnuk kơna giăm 40 thun. Pơdơi lơtret mơng thun 2008, ñu ăt ngă bruă amăng plơi pla, hơmâo 4 rơwang thun ñu ngă Kơ-iăng khua ping gah plơi laih anun lu thun ngă Khua khul mơnuih thun tha. Ră anai rơbêh 80 thun laih, ơi Quyền lăi, pơdơi laih bruă samơ̆ ƀu pơdơi ôh tơlơi glăm bruă; mơnuih ping gah dŏ hơmâo pran, ăt kiăng pơtrut tui tơlơi gơgrong bruă hăng khul grup kơnuk kơna hăng mơnuih ƀôn sang:“Kiăo tui Ping gah, pơklaih rơngai djuai ania laih anun hơmâo laih tơlơi hơdip rơnuk rơnua, mơ-ai pô. Anun lĕ tơlơi yâo mơak prong biă mă. Yŭ kơ tơlơi git gai mơ̆ng Ping gah, rơnuk anai tŏ tui ơi yă, anong wa, ngă hiưm pă pơtrut tui gru grua mơ̆ng Ping gah či akŏ pơdong lŏn ia tui Hră pơtrun Jơnum ping gah dêh čar tal 14 ba tơbiă, anun lĕ truh thun 2045 lŏn ia ta amra jing sa boh lŏn ia đĭ kyar”.

Tơdah tơlơi ƀuăn mơ̆ng ơi Nguyễn Hữu Quyền hơmâo gru kơđŏm ƀơi tơdron blah ngă, jing tơlơi đăo kơnang mơ̆ng mơnuih ping gah Y Hạ Niê Kdăm, ƀơi ƀut plơi 2 Tân Tiến, phường Buôn Ma Thuột, hơmâo bơbuă tui mơ̆ng thun blan nao pơ Kơdư lơ̆m glăk 8 thun đôč.

Mơ̆ng thun 1955, ơi Y Hạ Niê Kdăm hơmâo hrăm pơ Sang hră kơnuk kơna čem rông laih anun hơmâo 3 wơ̆t bưp Wa Hồ. Tơdơi anai, ñu ngă mơnuih kơhnăk ƀơi dêh čar Kur, giong anun glăi pơtô čơđai laih anun kơsem min bruă pơtô čơđai djuai ania ƀiă ƀơi Dak Lăk. Mơ̆ng rim bruă mă, ơi Y Hạ Niê Kdăm pơtă glăi pô ñu, kiăng bong kjăp pran jua mơ̆ng mơnuih ping gah hăng pơtrut pran đăo kơnang anun kơ hlăk ai tơdơi anai:“Amăng rơnuk anai, rơnuk pơplih phrâo laih, hăng mơnuih ping gah khŏm gir run kơ tơlơi pơmin mơ̆ng Ping gah. Gir djă pioh pran jua, ai hơtai mơ̆ng mơnuih cộng sản, mơnuih ping gah mơ̆ng Ping gah dêh čar”.

Hơdôm tơlơi ră ruai mơ̆ng ơi Nguyễn Hữu Quyền, Y Hạ Niê Kdăm brơi ƀuh, hăng lu mơnuih ping gah thun tha, ană mơnuih ta dưi ngă pơplih bruă mă, samơ̆ ƀu rơngiă ôh tơlơi gơgrong hăng khul ping gah, wơ̆t hăng mơnuih tơpuôl.

Hră pơtrun 21 mơ̆ng Khul khua apăn bruă ping gah dêh čar tal 13, kơnôl 16/6/2022, pơsit khul mơnuih ping gah jing anŏ yom biă mă, pơsit tơlơi rơgơi ngă khua, pran blah ngă mơ̆ng khul grup Ping gah; kiăng rim čô ping gah hlong či bơrơguăt mă pô, nao hlâo, ngă kơnuih hiam, hơmâo tơlơi pơmin klă, laih anun kiăo tui tơlơi ƀuăn lơ̆m phrâo mut Ping gah.

Hăng mơnuih ping gah pơdơi bruă thun tha, lơ̆m dŏ hơmâo pran, thâo ngă bruă mơn, bruă pơtrut tui tơlơi gơgrong bruă hơmâo amăng hrơi mông jơnum ping gah, pơgôp hiăp bruă mă amăng plơi pla, iâu pơthưr mơnuih ƀôn sang ngă tui tơlơi pơtrun, ƀudah pơtô glăi boh thâo mă bruă kơ hlăk ai.

Hơdôm tơlơi pơgôp hiăp anun ƀu ngă hmư̆ hing hyu pơ anai pơ adih ôh, samơ̆ anun jing bruă sa čô mơnuih ping gah djă bong tơlơi ƀuăn hăng Ping gah amăng tơlơi hơdip rim hrơi. Yă Tào Thị Nga, mơnuih ngă khua hơđăp mơ̆ng Sang bruă tơgŭ kơđi Mơnuih ƀôn sang tơring čar Dak Lăk, lăi pran jua hur har, nao hlâo, ba jơlan ngă bruă, blung a khŏm bong kjăp tơlơi ƀuăn hăng Ping gah laih anun mơnuih ƀôn sang:“Kâo ƀu thâo wơr ôh lơ̆m dong ƀơi hla gru Ping gah, kâo ƀuăn abih tơlơi hơdip anai gir ngă bruă kơ Lŏn ia, kơ mơnuih ƀôn sang, kơ Ping gah. 45 thun rơgao, pô kâo pơmin, mơnuih ping gah kar hăng gơmơi khŏm gir pơtŏp rơguăt, ngă kơnuih hiam kiăng rơnuk tơdơi anai gir hmư̆ tui, kiăo hmao rơnuk phrâo, kiăng lŏn ia hrưn đĭ amăng rơnuk phrâo”.

Amăng rơnuk blah ngă, tơlơi gơgrong bruă mơ̆ng mơnuih ping gah hơmâo lông lăng ƀơi anih blah ngă. Amăng rơnuk lŏn ia rơngai, pran jua nao hlâo, ngă kơnuih hơmâo ngă mơ̆ng hơdôm bruă jê̆ giăm amăng tơlơi hơdip: hiăp khŏm ngă, jê̆ giăm ană plơi, gơgrong bruă hăng mơnuih ƀôn sang.

Hră pơtrun 21 mơ̆ng Khul khua apăn bruă ping gah dêh čar tal 13 kiăng pơđĭ tui anŏ apăn bruă mơ̆ng mơnuih ping gah, hrŏm hơbit hăng pơtŏp rơguăt, nao hlâo, jing kơnuih hiam, laih anun bong kjăp tơlơi jê̆ giăm hăng mơnuih ƀôn sang. Tơlơi klah čun mrô 58 kơnôl 26/6/2026 mơ̆ng Ding jum kơđi čar tal 14, tŏ ngă tui Hră pơtrun 21, lăi dlăm akŏ pơjing khul mơnuih ping gah djơ̆ hăng bruă kiăng ngă amăng rơnuk anai.

Hăng mơnuih ping gah thun tha ƀơi Dak Lăk, tơlơi ƀuăn hăng Ping gah hơmâo tŏ tui hăng hơdôm bruă mă rơđah rơđông, mơ̆ng jơnum ping gah amăng plơi pla, pơgôp hiăp bruă hrŏm truh kơ pơtô glăi bruă mă kơ ƀing hlăk ai./.