Grup kơsem min hơmâo 17 čô, pơ ala mơ̆ng hơdôm gơnong bruă, khul grup hăng ƀing khua rơguăt bruă, hơmâo jao bruă hyu ĕp, sem lăng, pơhrua tui, čih pioh hră pơ-ar tơhan djai pơsăn drơi; čih hră tơhan djai, pơsat tơhan djai; pơƀut djŏp tơlơi klah čun hơmâo ƀơi tơring laih anun pơkra hră lơkak hyu ĕp, kuai rŭ tơlang tơhan. Biă ñu, grup amra čơkă mă, kơsem min, pơčrang, pơhmu nao rai djŏp tơlơi pơhing yua khul grup, mơnuih mơnam lăi brơi, pơƀut sem lăng hơdôm tơlơi pơhing bơdjơ̆ nao pơsat dor hrŏm. Mơ̆ng anun, hyu sem lăng, pơtŏng glăi, pok mông jơnum, klah čun glăi tơlơi pơhing, ngă atur či pok pơhai hyu ĕp, kuai rŭ tơlang tơhan djai drơi kơ lŏn ia.

Ngă tui “Bruă mă 500 hrơi mlăm”, truh ră anai tơring čar Gia Lai hơmâo ngă giong laih bruă mă čơđeh tơlang ƀơi 119 ƀut pơsat tơhan, hăng rơbêh 7.800 čơđeh tơlang dưi ba pơčrang ADN. Tơhan apăn bruă hơmâo rŭ đĭ 63 per tơlang tơhan. Ră anai, tơhan tơring čar Gia Lai glăk gir hyu ĕp, rŭ đĭ tơlang tơhan dŏ glăi ƀơi hơdôm anih blah wang đưm./.