VOV4.Jarai - Sang hră Cao đẳng Công Thương Việt Nam (gah Ding jum bruă mă-tơhan rơka - mơnuih mơnam) anih pơtô ƀơi tơring čar Dak Lak hơmâo pơphun jao prăk djru hrăm hră brơi ƀing čơđai ƀun rin, kĭ pơkôl pơtô hrăm brơi mơnuih mă bruă hăng tŭ mă gơnam măi mok amăng pơtô hrăm mơng hơdom anom bơwih ƀong sĭ mơdrô. 37 anung prăk djru, djru brơi rĭm čô mơng 1 klăk - 1 klăk 500 rơbâo prăk hơmâo ƀing čơmah djru brơi ƀing čơđai ƀun rin găn rơgao tơnap tap, pơhlôm brơi ƀing čơđai hơđong pran jua amăng bruă hrăm hră.

Amăng mông ngă lơphet, ơi Tô Viết Tài, Kơ-iăng khua sang hră Cao đẳng Công Thương Việt Nam, mă bruă ƀơi anih pơtô pơ Dak Lăk brơi thâo: Sang hră hơmâo ngă tui jơlan hơdră pơtô hrăm pơlir hăng djop anom bơwih ƀong sĭ mơdrô kiăng kơ ĕp brơi bruă mă brơi ƀing čơđai sang hră hăng bruă kĭ pơkôl ƀuăn 100% mrô čơđai amra hơmâo bruă mă lơ̆m hrăm giong. Yua anun djop gơnong bruă pơtô hrăm bruă mă hơmâo ruah lăp djơ̆ hăng tơlơi sit nik ƀơi ƀon lan.

Siu Đoan: Pơblang