Bruă pơplông hơmâo 2 bơnah: Gah tơlơi pơmin či ngă hăng Gah Kơčăo bruă tong ten (jing hơmâo laih gơnam pơkra rai). Gah tơlơi pơmin či ngă hơmâo tơlơi pơmin pơphun bruă bơwih ƀong hơmâo laih ƀudah aka ƀu hơmâo gơnam pơkra rai, hơbô̆ bruă ngă gru đôč (demo), samơ̆ aka ƀu ba pơƀuh pơ anih sĭ mơdrô laih anun aka ƀu hơmâo prăk pơhrui glăi ôh. Starup hơmâo tơlơi pơmin rơgơi, djơ̆ lăp amra hơmâo pơtŏp brơi, djru čih pơgiong tơlơi pơmin ngă bruă, jak iâu ƀing kơhnăk, pô tuh pơ alin prăk kăk đah mơ̆ng dưi pơjing hơdôm kơčăo bruă dưi ngă.

Gah Kơčăo bruă jing hơdôm bruă pơphun bơwih ƀong hơmâo laih gơnam pơkra rai, bơwih bơwang, hơbô̆ bruă hơmâo ba pơƀuh pơ anih sĭ mơdrô ƀudah hơmâo mơnuih blơi yua laih, hơmâo prăk pơhrui glăi; ƀudah aka ƀu hơmâo prăk pơhrui glăi samơ̆ hơmâo laih prăk ngă bruă, prăk pơkra gơnam hơmâo pơsit hăng hră pơ-ar, jŭ yap glăi či sem lăng prăk kăk dưi pơhrui glăi hơdôm pă.

Hơdôm kơčăo bruă dưi ngă lĕ hơmâo djru ngă pơgiong či sĭ mơdrô, pơtô brơi kiăng thâo pơblang, thâo ba pơƀuh gơnam, pơtruh hăng sang bruă mơdrô, mơnuih tuh pơ alin, laih anun gum ba gơnam pơplông ngui, pơphun bruă bơwih ƀong prong hloh.

Kơ-iăng nai tha prin, nai prin tha Lê Đức Niêm, Kơ-iăng khua sang hră Đại học Tây Nguyên, lăi bruă pơplông thun anai hơmâo anŏ lăp djơ̆, kiăo tui anŏ či kiăng, lăi dlăm kơ bruă kiăng ngă brơi tơlơi pơmin anun jing gơnam pơkra rai dưi mă yua, hơmâo nua yom: “Mơ̆ng tơlơi pơmin truh kơ anŏ yom jing bruă ngă rơđah rơđông, pơƀuh pran jua pơplih phrâo tui hăng hră pơtrun mơ̆ng Ping gah, kah hăng Hră pơtrun 57. Anun lĕ ba hơdôm hơdră ngă bruă, boh thâo phrâo či pơkra rai gơnam, hơmâo anŏ yom, dưi mă yua. anai lĕ tơlơi gêh găl kiăng ƀing pơphun bruă bơwih ƀong, sang bruă mơdrô phrâo gum ngă, blung hlâo lĕ hrăm tui, tơdơi kơ anun ba pơƀuh anăn gơnam, laih dong pơpŭ kơ hơdôm tơlơi pơmin pơčeh phrâo hăng anŏ yom mơ̆ sang bruă mơdrô pơkra rai”.

Hăng ƀing čơđai sang hră, bruă pơplông anai jing hrơi mông či sem lăng, hrăm tui hăng lông ngă lăng tơlơi pơčeh phrâo. Adơi Trần Thị Thiện Hạnh, čơđai sang hră Đại học Tây Nguyên, lăi: “Tơlơi pơplông anai yom biă. Djru kâo hrăm tui, lông ngă lăng, mơ̆ng anun djă pioh lu tơlơi thâo thăi či ngă bruă, djru brơi kơ bruă mă tơdơi anai dong”.

Ơi Trần Thanh Sơn, Kơ-iăng khua gơnong bruă boh thâo ia rơgơi tơring čar Dak Lăk, brơi thâo, bruă pơčeh phrâo glăk hơmâo phun atur laih, hơmâo jơlan gah či ngă bruă rơđah hloh hăng Hră pơtrun 57 hăng Tơlơi phiăn Boh thâo ia rơgơi hăng Pơčeh phrâo. Bruă pơplông anai pơtrut kiăng hơmâo tơlơi pơčeh phrâo, kơčăo bruă pơlir hăng akŏ pơdong sang bruă bơwih ƀong dưi pơkra rai anŏ yom, dưi mă yua laih anun pơgôp kơ mơnuih mơnam. Gơnong bruă boh thâo ia rơgơi amra djru pơtruh hăng sang bruă mơdrô, pô djru prăk kăk gum hrŏm hăng hơdôm kơčăo bruă mă pri, djru đĭ kyar sang bruă mơdrô hăng pok prong tui hơdôm hơbô̆ bruă dưi mă yua./.